《客語白話字聖經試讀版》

 | | | 轉寄

Yok-hon Fuk-yîm, Thi-4-tsông_ 1 Yâ-sû lâu Sat-mâ-li-â ke Fu-ngìn-kâ

作者 Hak-ngî Sṳn-kîn 2008.07.13

約 4:1 Tsú ki-yèn tî Fap-li-soi-ngìn yû thâng-tó Kì tsiap-ngìn tso mùn-thù, yû lâu kì-têu hàng sé-lî, pí Yok-hon kha tô;
約 4:2 (Khì-sṳ̍t Yâ-sû tshṳ-kâ m̀-sṳt tshîn-sṳ̂n hàng sé-lî, he Kiâ mùn-thù),
約 4:3 só-yî Kì tshiu lì-khôi Yù-thai, to-tsón-hi Kâ-li-li.
約 4:4 Kì yit-thin oi yù Sat-mâ-li-â kîn-ko.
約 4:5 Tsúng-he tshiu lòi-to Sat-mâ-li-â ke Si-kâ-tsṳ́n, lì Ngâ-kok pûn kì-ke lai-é Yok-sit ke thú-thi mò kí-yén.
約 4:6 Tshai ke-vi yû Ngâ-kok-tsiáng. Yâ-sû hàng-lu tshin khioi, tshiu tshô tshai ke tsiáng-sùn. Ke-sṳ̀ thai-yok tông-tsu.
約 4:7 Yû ke Sat-mâ-li-â ke fu-ngìn-kâ lòi tá-suí; Yâ-sû lâu kì kóng: “Pûn Ngài lîm.”
約 4:8 Yîn-vi Kiâ mùn-thù yí-kîn hi kiê-lu mâi sṳ̍t-vu̍t.
約 4:9 Ke Sat-mâ-li-â fu-ngìn-kâ tshiu tui Kì kóng: “Ki-yèn he Yù-thai-ngìn, tso- mak-ke lâu ngài Sat-mâ-li-â fu-ngìn-kâ thó-suí lîm nò?” (Yîn-vi Yù-thai-ngìn lâu Sat-mâ-li-â-ngìn mò siông-lòi-vông ).
約 4:10 Yâ-sû en kì kóng: “Ngì ki-yèn tî Song-tsú ke ên-tién, ya tî lâu ngì thó-suí lîm ke he má-ngìn; ngì tshiu pit khiù Kì, Kì tshiu pit-yû sâng-miang ke suí pûn ngì.”
約 4:11 Fu-ngìn-kâ tshiu lâu Kì kóng: “Tsú â ! Ngì mò tá-suí ke tûng-sî, tsiáng yu án tshṳ̂m; Ngì tui nai-vi yû liá-ke sâng-miang ke suí nè?
約 4:12 Ngì láu-tó Ngì thai ko ngài-têu ke tsú-fu Ngâ-kok mé? Kì pûn ngài-têu liá-ke tsiáng, kì tshṳ-kâ lâu kiâ lai-é, lâu kiâ thèu-sâng, ya-he tshai liá-ke tsiáng sṳ̍t- suí.”
約 4:13 Yâ-sû en kì kóng: “Fàm-ngìn sṳ̍t liá-ke suí voi tsai tsoi-tsâu;
約 4:14 Só-yû sṳ̍t Ngài só pûn kì-ke suí, yún-kiú m̀-voi hot; Ngài só pûn kì-ke suí pit-thin tshai kì tî-poi sàng-tso tshièn-ngièn, tshṳ̍t-tshṳ̍t yúng-tshut tshṳ̍t-to yún-sên.”
約 4:15 Fu-ngìn-kâ lâu Kì kóng: “Sîn-sâng yung liá-ke suí pûn ngài, sṳ́-tó ngài yún-yén m̀-voi hot, ya m̀-sṳ́ lòi liá-vi tá-suí.”
約 4:16 Yâ-sû lâu kì kóng: “Hi ham ngiâ ló-kûng lòi liá-vi.”
約 4:17 Fu-ngìn-kâ kóng: “Ngài mò ló-kûng.” Yâ-sû lâu kì kóng: “Ngì kóng, ngì mò ló-kûng, mò m̀-tsho̍k.
約 4:18 Yîn-vi ngì ki-yèn sṳt yû ńg-ke ló-kûng; liá-ha thùng ngì khiung-ha ke ya m̀-he ngì-ke ló-kûng; ngì kóng liá-ke fa he tsṳ̂n.”
約 4:19 Fu-ngìn-kâ lâu Kì kóng: “ Tsú â ! Ngài khon-tshut Ngì he siên-tî.
約 4:20 Ngài-têu ke tsú-siên he tshai liá-ke sân-táng kin-pai; tsúng-he ngì-têu kóng, ngìn yin-tông kin-pai Song-tsú ke só-tshai he tshai Yâ-lu-sat-lâng.”
約 4:21 Yâ-sû lâu kì kóng: “Fu-ngìn-kâ â ! Oi sin Ngài, sṳ̀-heu voi to lé, ngì-têu m̀-voi tsai-hi Yâ-lu-sat-lâng kin-pai Â-pâ, ya m̀-voi tsai-lòi liá-ke sân.
約 4:22 Ngì-têu m̀-sṳt ngì-têu só kin-pai ke; ngài-têu sṳt ngài-têu só kin-pai ke; yîn-vi tsṳ́n-kiu he tshut-tshai Yù-thai-ngìn.
約 4:23 Tsúng-he sṳ̀-heu voi to, liá-ha tshiu-he lé, tsṳ̂n-sîm kin-pai ke ngìn yung sṳ̂n-thí lâu tsṳ̀n-sṳ̍t lòi kin-pai Â-pâ; Yîn-vi Â-pâ he tshìm liá-tsúng-ngìn lòi kin-pai Kì.
約 4:24 Song-tsú he Sṳn-Lìn; ngìn kin-pai Kì, yit-thin oi yung sîm-lìn lâu tsṳ̀n-sṳ̍t lòi kin-pai.”
約 4:25 Fu-ngìn-kâ lâu Kì kóng: “Ngài tî Nì-soi-â (tsit-he tshṳ̂n-tso Kî-tuk ) oi lòi ; Kì lòi liá pit-thin oi tsiông yit-tshiet ke sṳ po ngài-têu tî.”
約 4:26 Yâ-sû lâu kì kóng: “Lâu ngì kóng-fa ke tshiu-he Kì.”
約 4:27 To liá-ha Kiâ mùn-thù tshiu-lòi; kám-kok tshin khì-kuai, khon-tó Kì lâu fu-ngìn-kâ kóng-fa; tsúng-he mò ngìn mun ke fu-ngìn-kâ “Ngì tshìm mak-ke?” ya-he mun Yâ-sû “Ngì ngóng-voi lâu kì kóng-fa nò?”
約 4:28 Fu-ngìn-kâ tshiu piong kì-ke suí-vung tshai ke-vi, hi kiê-lu, lâu ke-têu ngìn kóng:
約 4:29 Lòi khon yit-ke ngìn, ngài phìn-sṳ̀ só tso ke sṳ Kì tshiòn-phu yû lâu ngài kóng: “Liá-ke kám-he Kî-tuk mâ?”
約 4:30 Kì-têu tshiu lì-khôi kiê-lu lòi khon Yâ-sû.
約 4:31 Liá-sṳ̀ mùn-thù ham Kì kóng: “Sîn-sâng tshiáng sṳ̍t.”
約 4:32 Tsúng-he Kì lâu kì-têu kóng: “Ngài yû tûng-sî hó sṳ̍t, he ngì-têu m̀ tî ke.”
約 4:33 Mùn-thù tshiu sông-liòng kóng: “Kám-kóng yû ngìn sung tûng-sî pûn Kì sṳ̍t mâ?”
約 4:34 Yâ-sû lâu kì-têu kóng: “Tsûn-hàng ‘Tshâi Ngài lòi ke ngìn’ ke tsṳ́-yi lòi tso-vân Kì-ke kûng, tsit-he Ngài-ke liòng.
約 4:35 Ngì-têu kóng: ‘Kâ si-ke-ngie̍t, tsang-he sû-kot ke sṳ̀-tsiet?’ Khon-â! ---Ngài lâu ngì-têu kóng, kí-hí ngì-têu ke muk khon-thièn, thièn yí-kîn vòng, hó sû-kot lé.
約 4:36 Sû-kot ke ngìn tet-tó kûng-tshièn ya vi yún-yén ke sâng-miang tsit-tshùn ńg-kuk; sṳ́ ve-tsúng ke ngìn lâu sû-kot ke ngìn hó yit-thùng fôn-hí.
約 4:37 Yîn-vi siu̍k-ngî kóng: ‘Tshièn-ngìn tsâi-tsung, heu-ngìn sû-sṳ̀n’, tshai liá-ke sṳ tshiu-he tsṳ̂n-sṳ̍t.
約 4:38 Ngài tshâi ngì-têu hi sû-kot m̀-he ngì-têu kâng ke thièn-thi; phe̍t-ngìn yû nú-li̍t, ngì-têu yû hióng-su kì-têu ke nú-li̍t.”
約 4:39 Kiê-lu yû tshin-tô Sat-mâ-li-â-ngìn sin-kho Kì, he yîn-vi ke fu-ngìn-kâ só kien-tsṳn ke fa, “kóng Kì tsiông ngài só hàng ke sṳ tshiòn-phu kóng pûn ngài tî.”
約 4:40 Tsúng-he Sat-mâ-li-â-ngìn khon-tó Yâ-sû, tshiu khiù Kì lâu kì-têu khiung-ha he̍t; tshiu he̍t tshai ke-vi lióng-ngit.
約 4:41 Yí-kîn tshin-tô ngìn yîn-vi Yâ-sû ke fa lòi sin.
約 4:42 Kì-têu tshiu lâu ke fu-ngìn-kâ kóng: “Liá-ha ngài-têu sin, m̀-he yîn-vi ngì kóng ke fa; yîn-vi ngài-têu tshîn-sṳ̂n thâng tho-lî, tshiu tî liá-ke sṳ̍t-tshai he sṳ-kie ke Kiu-tsú.”