《戀戀台灣客家文學》

 | | | 轉寄

桐花新娘(1)

作者 Suingi 2011.01.30

　　風m̀知tui nái吹過來，pûn滿樹桐花一蕊蕊飛到秋妹身項，像一領雪白ke新娘衫，lâu佢打扮到像新嫁娘。M̀過，這位「新娘」完全m̀知這件事情，做佢安詳幸福ke ti該油桐樹下睡當晝。

　　也全m̀知該日，有一儕人看佢看到發咄愕，恅著佢he桐花仙子……。


１． 　　鈴鈴鈴……鈴鈴鈴……

　　鈴鈴鈴……鈴鈴鈴……鈴鈴鈴……

　　鈴鈴鈴……鈴鈴鈴……鈴鈴鈴……鈴鈴鈴……

　　天甫光仔，這間mò到兩坪大ke台北舊陋小套房，卻發出一波又一波ke鬧鐘聲，一擺比一擺還啊大聲，愛lâu睡到會翻（pién）過來ke主人——曾有嫻吵hong起來。

　　「啊！七點零咧！」皇天不負苦心人！主人總算hong矣(è)！但he佢hong起來第一件事情就he lâu忠心喊佢hong床ke僕人抨到地泥下，同間項散落一地ke客家桐花季資料作伴。

　　2010年4月1號愚人節——哼！這日仔實在有靚！

　　佢，曾有嫻，he一位苦命鬼！對大學畢業到這下，尋頭路尋了有半年，mò-án-kôi正尋著頭路，續堵著一ke怪頭家。M̀單只錄取人ke標準奇奇怪怪，人家正開始做，佢就出難題考人，實在pûn人當閼！

　　鈴鈴鈴……鈴鈴鈴……

　　這擺換第二號忠心僕人——手機仔吵佢。

　　手機仔顯示：「頭家」，曾有嫻忍等想切忒電話ke衝動去接電話：「喂，頭家，恁早。」口氣一變，像加了蜜。

　　唉！Mò辦法，食人頭路咩……

　　「哈哈！『恁閒』，早啊！」客語摻華語。Pûn佢片背罵到臭頭ke頭家異像心情當好。

　　「敗勢喔！Ngài安做『有嫻』，m̀-he『恁閒』！」曾有嫻再ko忍等想切忒電話ke衝動。為著頭家交代ke「偉大」任務，佢昨暗晡拼夜事拼到五點，正睡兩點鐘，又愛hong起來準備行裝，等下愛坐車去新竹參加兩日一夜ke桐花季活動。Nái「恁閒」咧？假使m̀-he為著「五斗米」，佢馬上切忒電話！

　　「哈哈！共樣啦！」佢正m̀管佢安做麼个閒：「上擺妳來面試，一食ngài調製ke『擱再來』綠茶，就知ngài用了五種食材。Ngài相信憑若天賦，一定做得調製得出ên『福爾摩沙』飲料店『客家週』系列限定茶。」

　　「……」曾有嫻mò想ko講話。

　　佢yi想解釋上擺he一場「美麗ke意外」。佢食得出來該怪飲料ke成分，實在he厥姆平時對子女「訓練有素」，輒常做奇怪ke料理pûn佢兜食。為著自家ke生命安全，大家都有精明ke舌嫲，一食，就知該底肚放麼ke料。

　　老實講，佢he台文系畢業ke學士，根本m̀曉得調製飲料。佢會去應徵「飲料調製師」，實在he台文系出來愛尋頭路mò恁該，尋了半年，也心冷咧！總就麼个頭路都試看仔，面皮賁賁就去面試。結果，就恁呢迷迷糊糊pûn這奇怪ke頭家錄取矣(è)！

　　本旦尋著頭路，pûn佢暢到想打紙炮慶祝。「做mò一湯匙，愛食一碗公」——確確he世間mò好空ke事。頭家mò幾久就出了難題pûn佢，oi佢調製出以桐花為主題ke客家飲料，打算ti桐花季推出，餳人來買。假使調製m̀出，就準備包袱款款轉去食自家！另外兩位pûn錄取ke阿雲同卡頓乜共樣。分別照大家ke族群身份，阿雲oi負責調製出代表「學老」ke特色飲料，卡頓負責調製出代表「原住民」ke特色飲料。

　　「喂！妳睡忒唷？仰mò講話？」

　　「頭家，失禮，ngài這下愛赴車咧！」mò等電話該頭應聲，佢煞煞切忒電話，遽遽出門，有一種報復ke爽快！

　　這天氣就同頭家共樣——奇奇怪怪！

　　曾有嫻mò恁該正赴著公車，看等車窗外ke景色，佢得出這結論。

　　今年天氣亂糟糟，三日落雨兩日晴，寒天mò寒，熱天mò熱，就像佢頭家，一下像大好人，願意錄取佢，一下後哀面，愛佢這mò經驗ke人兩禮拜調製出代表「客家」ke飲料。

　　像恁呢ke天氣，m̀知桐花會受影響mò？

　　佢開始愁慮，m̀過mò幾久，佢就到夢鄉去矣(è)。昨晡日正睡兩點鐘目定定，也莫怪佢一下就睡忒矣(è)，車仔一路搖搖當當，夢跈毋著車仔，自家一儕路上跈揚尾打草蜢……