《戀戀台灣客家文學》

 | | | 轉寄

三角效應

作者 Suingi 2009.07.26

　　結束mò閒ke兩年研究生生活，總算做得透一口氣，放暑假去。二姊推薦ngài看一部日劇——「三角效應」。佢he一部懸疑日劇，講一件25年前ke命案，在時效過忒以後，又重新開始追查。25年前lâu受害人同班ke同學，因為該場命案，大家ke心靈都受到異大ke傷害。成人長大後，有人在雜誌社做事，偷偷仔收集該年命案ke線索；有人做警察，就為到親手查出兇手；有人成為命案女主角ke替身，pûn厥姆收養。

　　這部日劇好看ke所在，m̀單he集集懸疑ke情節，還有佢背後深層ke意義。

　　在這世界上，逐日都有人死，選擇做警察ke鄉田先生，在行上這條路開始，看過忒多命案，比厥過身ke朋友命案還卡離奇ke都有，看了忒多，人心就定定仔麻痺。但he，就像鄉田先生所講：「就算恁呢，逐條生命都he珍貴ke，做m̀得遺忘。」逐日ên打開報紙，就會看到日日都有mò共樣ke事情發生。對新聞肚ke命案，受害人家屬ke目汁，m̀會試著生份。時間一長，無論樣仔ke命案乜漸漸遺忘，或者失去感覺。

　　但he，恁呢he好抑m̀好？

　　逐條生命都he愛珍惜ke，只有珍惜，正了解愛尊重。無論he對別人，抑he對自家都共樣。Mò人ke命特別賤，對人m̀好大細心。