《江秀鳳散文專欄》

| | | 轉寄

秋田嘟嘟

秋田狗he日本品種ke狗仔,同台灣土狗身形當像,這隻狗仔he ngà歸屋下人轉去台北阿伯、阿叔屋下ke時節,阿叔送分ngài ke,盡記得該日ngà爸對台北駛車仔上高速公路,行到中壢ke時節,狗仔就開始翻(phôn),ngà姆講狗仔怕he暈車吔,吩咐ngà爸等下有交流道就煞煞下去,下到交流道就同狗仔牽下車,pûn kì透一下萋萋ke空氣,ngà姆喊ngà爸遽遽去買暈車藥,阿姆同阿姐七手八腳lâu狗仔翻過ke車肚拚掃淨俐,拿面帕準桌布,捽淨來。

  狗仔同ngài-teû mò熟事,故所ngài oi掌等狗仔,ngài緊挲kiâ頭那lâu背囊,看kì艱苦到懨懨,me怕mò體力走忒,等ngà爸買暈車藥轉來,還買一垤pháng,lâu藥仔包到pháng肚項,拐狗仔食,狗仔怕艱苦m̀肯食,吾爸就耐心拐kì食落去,尞成點鐘過後正上高速公路轉台中,好得阿姆án精,想著這隻辦法,一直駛車到屋,狗仔就mò再過翻。

  轉到屋,大家參詳oi lâu kì安麼个名,安歸暗晡就mò結果,阿姆又講就本本照阿叔安ke名好了,狗仔來到生份人ke屋下,會m̀慣又同kì改名yi衰過,平時喊kì嘟嘟,he oi正式紹介kì就用kiâ品種做姓,安到秋田嘟嘟。

  嘟嘟當乖,m̀會lám糝吠,ngài-teû畜kì成隻月,隔壁鄰舍就m̀知ngà屋下yû畜狗仔,狗仔盡yû人情,ngà屋下人逐儕轉屋,kì就會搖尾做嬌,ngài當中意狗仔,書包仔放到地泥下,就同嘟嘟共下搞,一半擺搞到m̀記得,阿姐就會喊ngài入去廳下寫作業。

  等到嘟嘟在ngà屋下戴慣了,me lâu ngài-teû kha 熟事ke時節,ngà爸正敢渡kì出去尞,ngà爸該央時yû參加野球隊,就渡狗仔同屋下人共下去擲球仔,還yû擲飛盤,嘟嘟當精kì比ngà姐還kha會接飛盤,me當會拈球仔,mò想著嘟嘟體力án好,搞到當暢。另外一片,有一陣高中生在該練球仔,一粒球仔好恬恬飛一路過來,直直擲著嘟嘟,ngài-teû嚇到歸身冷汗,mò想著嘟嘟一躍就lâu球仔用嘴接等,yu遽遽走等去,還擲球仔ke細阿哥仔,原來ngà屋下yû一隻án慶ke狗仔,mò渡kì出來尞,還m̀知kì án yû才調,轉到屋下定著oi賞kì一餐豐沛正好。

  2018.6.13在台中55路公車頂