《江秀鳳散文專欄》

 | | | 轉寄

做雞卵糕

作者 江秀鳳（四縣腔） 2018.09.09

Ngài讀小學就當好做點心，該央時電視yû一個節目「做點心過生活」，逐擺看忒該隻節目，就會尋盆頭缽仔做點心，盡多he麵粉類ke，當簡單，大體就做得成功，屋下人me yi會相惜，見擺就食淨淨，yû可能he屋下人ke支持，pûn ngài緊做緊yû信心。

　　M̀過，yû一擺做雞卵糕，仰般做就m̀會成功，lâu雞卵糕做到變甜粄，ngà爸ngà姆同阿姐me mò嫌，yu me食淨淨，ngài總he m̀認輸，還he緊做，ngà姆試著ngài緊做失敗盡m̀盼得，就渡ngài去kì開麵包店ke同學店項，請師傅教ngài做雞卵糕，原來雞卵糕打卵白ke時節，做m̀得用食飯ke筷仔攪，愛買打卵白專用ke打卵摝仔攪畀勻，還有發酵ke問題，發酵發m̀起來莫怪做m̀成功。

　　Ngà姆一等惜ngài，跈等就渡ngài去烘焙專賣店買pûn ngài，ngài暢到奈m̀得，轉到屋又煞煞做雞卵糕，這擺頭一到做成功了，還歡喜哪！還切兜送pûn隔壁鄰舍嚐，大家就阿惱ngài án慶，讀小學ke細人仔就會做雞卵糕。

　　雞卵糕做兩擺都yû成功，第三擺yu失敗咧，原因he ngà姆kiâ同學pûn ngài ke發酵用忒了，ngài自家去烘焙專賣店買ke發酵m̀會發，這擺yu變到失敗ke m̀成甜粄了，歸屋下人還he then手食淨淨，偷偷仔lâu你講，做失敗ke東西正經當m̀好食，ngà屋下人he惜ngài，m̀盼得打落ngài yu惜福，正會刻耐仔食忒，這下愐著正知歸屋下人yû幾支持ngài，ngài在一個yû淰淰ke愛ke屋肚大，故所ngài還幸福哪！承蒙阿爸阿姆lâu阿姐ke相惜，ngài愛你兜，恁仔細。

　　做點心he ngà興趣，到這下還輒輒渡ngà外甥女，mò就he姐妹伴共下做兜披薩、黃梨酥、日頭餅，還有自家想空想缺做出來ke，包糍粑仔ke pháng，該擺pûn ngà姆食到流目汁，kì講：「糍粑仔he客人ke點心，ngài食著故鄉ke心焦，盡感動。」

Ngài lâu阿姆捽目汁，知kì一個客家妹一儕人在都市生活，又滿哪緊搬屋，流浪he客人族群ke命運，ngà姆揇等ngài還緊噭：「你大了，oi知自家ke客家血脈，做m̀得m̀記得你he苗栗客人ke妹仔。」

　　2018.5.27中壢轉台中火車頂