《山肚ke暗夜》

| | | 轉寄

Hà-kûng kia̍p fâ chṳ̂ yit (蝦公夾花 之一)

摘一蕊蝦公夾
Chak yit lùi hà-kûng-kia̍p
做成
Cho-sṳ̀n
細人仔chia̍p-chia̍p搞ke飛行機
Se-ngìn-é chia̍p-chia̍p káu ke pî-yàng-kî
追尋
Chûi-chhìm
童年ke腳跡 … …
Thùng-ngièn ke kiok-chiak
田唇路
Thièn-sùn lu
河壩唇
Hò-pa-sùn
山林肚
Sân-lìn-tú
娘花割傷跳上跌落ke手腳
Ngiòng-fâ kot-sông thiau sông tiet-lo̍k ke sú-kiok
蝦公花草揉出靈秒ke草藥
Hà-kûng fâ-chhó ngiô-chhut lìn-meu ke chhó-yo̍k
淺淺ke傷口
Chhién-chhién ke sông-heú
深深ke記憶
Chhṳ̂m-chhṳ̂m ke ki-yi
摘一盆蝦公草
Chak yit-phùn hà-kûng-chhó
Teu轉
Teu-chón
無幾時有用過ke灶頭下
Mò-kí-sṳ̀ yû yung-ko ke cheu-theù-hâ
Mén起
Mén-hí
頭pái ke歲月 … …
Theù-pái ke sui-ngie̍t
番薯籤
Fân-sù-chhiâm
鹽膚木
Yàm fû-muk
豬油粕
Chû-yù-phok
花葉炒出鮮嫩鮮嫩ke味道
Fâ-ya̍p chháu-chhut siên nun siên-nun ke mi-tho
肚屎裝入無食無飽ke湯頭
Tú-sṳ́ chông-ngi̍p mò sṳ̍t mò páu ke thông-theù
苦苦ke滋味
Fú-fú ke chṳ-mi
希望ke人生
Hî-mong ke ngìn-sên