《善雄牧園》

 | | | 轉寄

祈禱ke模範(1)(修訂版)

作者 邱善雄 2011.11.06

祈禱對ên-têu信徒ke生活tshin重要，m̀-ku有幾多人m̀知oi án-ngiòng祈禱，有ke tshin少祈禱，故所ên-têu信徒時常忽略祈禱，使到ên-têu失去新ke氣力。在以賽亞40:31有講：「獨獨依靠耶和華ke, oi得到新ke氣力，他têu像鷂婆展翼飛高，他têu走也m̀厭、行也m̀會累。」你看假使有祈禱依靠上帝ke人係yit大ke福氣。故所ên-têu ke主耶穌基督在世時有留tshin多祈禱ke模範pûn ên-têu，像主上山祈禱kuî夜（Luke 6:12）；又親身教示ên-têu祈禱就係主ke祈禱文，祂教ên-têu祈禱時，第一oi先榮光上帝，然後tsang為人lâu世事來祈禱。故所ên-têu信徒祈禱m̀係先為自家，oi先為上帝國lâu別人，然後tsang為自家來祈禱。

Ên-têu看亞伯拉罕ke祈禱就做得知m̀係為他本身來求，係為所多瑪lâu俄摩拉二城來祈禱，詳細來講，就係為他ke姪仔羅得來祈禱。在舊約中有摩西，做得做ên-têu祈禱ke模範，ên-têu看他têu ke祈禱，都係為國家、百姓來祈禱，故所ên-têu信徒oi先為上帝國、自家ke國家、百姓、社會、教會lâu ên-têu ke家族lâu家庭來祈禱，然後tsang為自家ke事來祈禱。

現在ên-têu來研究亞伯拉罕所留pûn ên-têu祈禱ke模範，簡單做得分做八點來研究lâu做ên-têu祈禱ke模範。

1、亞伯拉罕係khî在上帝ke面前來祈禱。亞伯拉罕無對天使或別人來祈禱，獨獨對上帝祈求。故所ên-têu信仰對於在祈禱ke事也oi像án-ngiòng入你ke房，關門求你têu ke父，住在隱藏ke, 就近你ke父鑒察，在隱藏ke來報答你。（matt6:6）又ên-têu ke祈禱oi像亞伯拉罕親近上帝共樣；希伯來10:22講：「Ên-têu oi用真實ke心充滿ke信，圓身也已經受清水洗，來親近ên-têu ke上帝。」又雅各書4:8也有講：「Ên-têu假使親近上帝，上帝也oi親近ên-têu，故所ên-têu oi像亞伯拉罕親近上帝來對祂求討，上帝也定著oi親近ên-têu,聽ên-têu ke所求。」

2、亞伯拉罕祈禱時有指定一項事來祈禱，就係講他有用專一ke心來祈禱，m̀係隨便亂祈求。雅各書4:3講：「你têu求m̀到係因為你têu妄求，故所ên-têu信徒祈禱時做m̀得妄求，oi像亞伯拉罕用專一ke心祈求上帝，tsang做得得到接納。」又ên-têu ke祈禱也做m̀得像主耶穌所比喻ke法利賽人ke祈禱，因為他ke祈禱雖然多，m̀-ku 得m̀到上帝ke接納（Luke 18:9~14），故所，主教示ên-têu祈禱時話m̀得反覆，講tshin多話像外邦人，因為他têu以為講tshin多話，tsang做得聽到，ku-só你têu 做m̀得學他têu, 因為你têu màng求之先，你têu ke父已經知你têu所欠用ke（matt 6:7,8）。故所ên-têu祈禱時m̀-sṳ́重複或講tshin多話，第一要緊就係在祈禱前，oi先省察要求mak-ke? 係為教會或別人，或本身，然後tsang來用專一ke心，為ke項事來祈禱。

3、亞伯拉罕有勇氣ke態度來祈求：Ên-têu看亞伯拉罕在對上帝祈求ke情景係像lâu朋友講話共樣，可見上帝係仁慈，又有慈悲，做得親近ke上帝，故所ên-têu m̀-sṳ́驚，oi勇敢向上帝祈禱，又ên-têu ke祈禱oi像亞伯拉罕ke迫切。Ên-têu oi勇敢來到上帝ke面前對祂懇求。

4、亞伯拉罕有謙卑ke心來祈禱

I、亞伯拉罕sṳt講：「我雖然係塵灰，tui liá二句pûn ên-têu做得知，亞伯拉罕係看自家最微小、最卑微，係像主所講，在Luke18:13 ke比喻共樣，liá-ke比喻在講有一位稅使入殿祈禱，用卑微、痛悔ke心來求上帝赦免，ên-têu知他ke祈禱有得上帝ke感納，勝過ke位法利賽人，ên-têu祈禱時oi存謙卑ke心來求討，tsang會得主ke感納。

Ṳ、亞伯拉罕求上帝容允他再講一pái, liá做得知亞伯拉罕ke智識tshin少，m̀敢用人ke智識來左右上帝ke計畫，因為上帝係萬權能，全智ke上帝，故所ên-têu祈禱時oi謙卑，知ên-têu ke智識m̀完全，有限，故所做m̀得強求，tsang免除禍患。