《李喬小說─荒村》

 | | | 轉寄

一、寄愁埋憂(11)

作者 李喬 漢羅翻寫：劉敏貞 2009.06.28

明鼎也chhin想進郭先生屋肚會會鄭蔡二位。M̀-ku廖lâu芳枝不在ke 底背；他實在無膽自家就闖去會見liá樣ke大人物。阿爸真實做得遽遽出來嗎？應該問清楚，M̀, 或者liá下就到郡役所探一下。

正在遲疑間，一ke巡查朝他行來，他chhin自然a朝南端製糖會社方向行去。巡查m̀知係故意還係無意，kín 跈上來，他只好繼續行。 「天光日再請一日假，現在先轉去lâu大哥講......」他想。

他行到南苗栗盡頭ke岔路口lè, 往左行就到製糖會社，然後轉去大湖；往右行係「牛屎崎」，崎底有一座「萬善祠」。明鼎幾年前sṳt在liá片寄宿兩年—ke時大湖國校還màng設置「高等科」，他來苗栗街建功國校讀高等科，無親友在街上又租不起房屋，只好一ke人像乞食ke, 一鑊一碗，在萬善祠lâu鬼為鄰，辛苦熬過兩年。

鬼巡查無跈上來吧。他用蹲下去繫鞋帶ke動作，低頭往後瞧去。嗯，無跈上來。

他企起來，sa在liá時節瞥見郭芳枝正企在岔路口ke榕樹下好像「不經意」a揮動手上ke菅草花。她，liá時節換上白底淡淡碎花ke「台灣衫」......

明鼎愣tén. 芳枝迅速轉身朝萬善祠ke片行去，行chhin慢，m̀-ku無回頭看明鼎。明鼎用力搖頭，好像oi使自家更清醒teû，然後維持一段距離，跈上去。

「她係有話lâu我講......」明鼎想：「M̀-ku liá-ke時侯，我樣仔還有閒情......」

芳枝已經行進萬善祠ke大門。她在進門ke瞬間總算回頭向明鼎留了一眼。明鼎心口一熱，一切紛紜繁複ke意念暫時消隱lè,他行開大步跈過去......