《江嵐客家文學專欄》

 | | | 轉寄

Ngiu̍k-làn-fâ...玉蘭花

作者 Kông-làm...江嵐 2008.03.16

listen



Sîn-fûn ke ngièn
新婚該年
Tsung yit-thèu ngiu̍k-làn-fâ
種一頭玉蘭花
Ti vò-thàng
佇禾埕
Yung tshoi-kuáng lâu sé-sâm-suí lìm-thai
用菜梗lâu洗衫水淋大
M̀-tô-tî-é
M̀多知仔
Lai-é thó pû-ngiòng ke am-pû
賴仔討pû-娘該暗晡
Pí sîm-khiû lai-e2kha kô kha thai ke
比心舅賴仔kha高kha大ke
Ngiu̍k-làn-fâ
玉蘭花
Sa hó tiâm-tiâm khôi-tén mân-su ke fâ
Sa好恬恬開等滿樹ke花
Pûn sṳ̍t hí-tsiú ke ngìn-hak
Pûn食喜酒ke人客
Sṳ̍t to kuî yèn-sṳ̂n ke hiông-hi
食到歸圓身ke香氣
Tai-tsón vuk-kâ hi
帶轉屋家去

Sióng-tò ke-yông-sṳ̀
想到該樣時
Lai-é tshut-se tsiu mò Â-pâ
賴仔出世就無阿爸
Nen kak muk-tsṳp hiuk to kîm
乳 kak目汁畜到今
Tak-ngièn tshiu lâu ngiu̍k-làn-fâ pí-kô
逐年就lâu玉蘭花比高
Sàng-sṳ̀ he muk-tsṳp siông-tui
成時he目汁相對
Sàng-sṳ̀ he tsṳ́-ôi tui-siong
成時he子女哀對相
Ngiu̍k-làn-fâ ngit-ngit yung tshṳ-kâ ke seu-yùng
玉蘭花日日用自家ke笑容
Ôn-vi kì lióng-sà
安慰佢兩儕

Ngìn-hak san-tshiang
人客散淨
Thot-hâ tso kâ-ngiòng ke sîn-sâm
脫下做家娘ke新衫
Sú-kiok sé-hó ngi̍p kiên-fòng
手腳洗好入間房
Vû-set ló-kú-túng ke khui-é-táng
烏色老骨董ke櫃仔頂
Piong-tén yit-phàn siet-pha̍k ke ngiu̍k-làn-fâ
放等一盤雪白ke玉蘭花
Lâu sîm-khiû tá ke yit-tui sú-ak
Lâu心舅打ke一對手扼