《江嵐客家文學專欄》

 | | | 轉寄

Tsên-vùn-hâi ke kô-sâng...曾文溪ke歌聲

作者 Kông-làm...江嵐 2008.03.02

listen



He má-sà tshôi-yá tiâm-tshin ke ngie̍t-ya thàn-tshong
he麼儕在這恬靜ke月夜彈唱
Yit-phô yit-phô tui yén-yén ke am-ya tshòn-lòi
一波一波對遠遠ke暗夜傳來
Yit-sú tsû-tshu̍k ＜Homeyaya＞ ke kô-sâng
一首鄒族＜Homeyaya＞ke歌聲
Tui yá-tsak sân-thèu yin-ko ke-tsak sân
對這隻山頭映過該隻山
Thâng-tó Tsên-vùn-hâi tui sân-táng yit-lu tshong-hâ-lòi
聽到曾文溪對山頂一路唱下來
Tshong-tshut Â-lî-sân fûng-yùn yúng-hí ke sâng-se
唱出阿里山風雲湧起ke聲勢
Tshong-tshut tsû-tshu̍k seu-ngièn yîn-hiùng thai-tám ke tá-la̍p ko-tshàng
唱出鄒族少年英雄大膽ke打獵過程

Son-lòi he nai-vi tshòn-lòi ke kô-sâng
算來he奈位傳來ke歌聲
pûn ngài thâng-tó yeu-phò lâu thai-thèu-lièn tá-tsoi-kú
pûn我聽到鷂婆lâu大頭鰱打嘴古
Tshîn-thùng tsṳ ke lin-long-é lâu tsúng-thúng-ǹg hêm-siáng
青銅製ke鈴琅仔lâu總統魚喊醒
Hau káu-suí ke ap-è tshôi Tsên-vùn-hâi piên tshiù-lòi-tshiù-hi
好搞水ke鴨仔在曾文溪邊泅來泅去
Yit-puk fat-fat ke Kâ-nàm-phìn-yòng vu̍t-sán fûng-fu ke kín-siong
一幅闊闊ke嘉南平洋物產豐富ke景象

Yit-sú ＜Homeyaya＞ ke kô-sâng
一首＜Homeyaya＞ke歌聲
Pûn ngài thâng-tó m̀-ki-tet soi-muk
Pûn我聽到m̀記得睡目
Tshiên-kî tshiâng-tsuk tso hièn
千支青竹做弦
Van-thèu liu̍k-su tso ten
萬頭綠樹做凳
pûn lòi-lòi-vông-vông ke vû-mien-phì-lu tshô-liau
pûn來來往往ke烏面琵鷺坐聊
Van- khién liòng-thièn pûn yù-tshoi-fâ tá-pan to tsiâng-tsiâng
萬頃良田pûn油菜花打扮到靚靚

Yit-thiàu sân-kô tshong ko yit-pak-sâm-sṳ̍p-pat kûng-lî yén
一條山歌唱過１３８公里遠
Tshôi lò-kú nau-thiên ke tshit-kú tshut-hói
在鑼鼓鬧天ke七股出海
Tsên-vùn-hâi tshong-tshut liù-thung ke kô-sâng suí-yáng
曾文溪唱出流動ke歌聲水影
Yit-sên-ngìn tshôi ngà-ke ngí-kûng-thèu fî-hióng
一生人在吾ke耳公頭回響