《《原鄉.夜合》 客語詩集》

| | | 轉寄

六堆客家人 Liuk tûi Hak Kâ ngìn

亞洲大陸ke流浪族群
Á Chû thai liu̍k ke liù long chhu̍k khiùn
將生命交分海峽黑水溝
Chiông sên miang kâu pûn hói kiap vû súi kiêu
來到南台灣屏東平原
Lòi to nàm Thòi Vân Phìn Tûng phìn ngiàn
向地泥河壩牛姆豬仔禾仔講客話
Hiong thi nài hò pa ngiù mà chû é vò é kóng Hak fa

請來三山國王ke山神
Chhiáng lòi sân sâm koet vòng ke sân sṳ̀n
落腳佇高屏溪東港溪林邊溪邊
Lo̍k kiok thê Kô Phìn Hâi Tûng Kóng Hâi Lìm Piên Hâi piên
一路流浪落來ke靠山族群
Yit lu liù long lo̍k lòi ke kho sân chhu̍k khiùn
變成靠河壩ke農民
Pien sṳ̀n kho hò pa ke nùng mìn

三百零年來,守著這塊土地
Sâm pak làng ngiàn lòi,sú tén yá khoai thú thi
毋會少祖先ke血汗流落圳溝水
M̀ voi seú chú siên ke hiat hon liù lo̍k chun kiêu súi
六大庄頭正像大樹紮入地泥肚
Liuk thai chông theù chang chhiong thai su chat ngi̍p thi nài tú

跈著含笑樹蘭夜合同桂花香
Thèn tén hàm chhiáu su làn ya ha̍p thùng kui fâ hiông
就尋得到客家人屋家
Chhiu chhìm mé tó Hak Kâ ngìn vuk khâ
愛花香又勤儉ke勞動民族
Oi fâ hiông yu khiùn khiam ke lò thung mìn chhu̍k

好讀書又清淨ke客家人
Hau thu̍k sû yu chhîn chhiang ke Hak Kâ ngìn
毋好忘了客家話
M̀ hó mong liáu Hak Kâ fa
毋好離開六堆家園
M̀ hó lì khôi Liuk Tûi kâ yàn
像樹根咬狠腳底土地
Chhiong su kîn ngâu hèn kiok tái thú thi
吸飽地泥水
Khip páu thi nài súi
生滿樹葉開滿花
Sâng mân su ya̍p khôi mân fâ
代代傳落去
Thoi thoi chhòn lo̍k hi



台灣土地已經聽得識客家話
Thòi Vân thú thi yí kîn thâng tet sṳt Hak Kâ fa
認得出六堆客家人
Ngin tet chhut Liuk Tûi Hak Kâ ngìn
瞭解伊等對家園ke愛
Liáu kiái kì tên tui kâ yàn ke oi




咬狠=咬緊