《戀戀台灣客家文學》

| | | 轉寄

小說:〈戀〉(10)(煞棚)

  「嘿,到哩喲!」陳風喊轉ngâ三魂七魄。

  面前he ngài熟識ke烏金烏金ke長頭那毛,但he陳風共樣he光頭,kì變作另外一儕人ke頭那毛。

  陳風行過去,揇等kì,lâu ngài紹介:「這he圓圓,ngâ女朋友。」笑笑仔、面紅紅仔:「Án-nè,你tî ngài做麼mò oi接受巧克力咧hò?」

  圓圓lâu kì,國中就共下,因為圓圓得著癌症,兩人ke戀情ya受著兩片家長ke反對。圓圓ke阿爸、阿姆驚怕耽誤陳風,國三愛拚會考,假使陳風因為圓圓mò考好,仰結煞?陳風ke阿爸、阿姆me試著國三he當重要時期,陳風緊走院項看圓圓,mò心看書,成績跈等圓圓病情起起落落,kì-teû做yà-ôi ke,心情me像坐雲霄飛車,mò安mò樂。陳風lâu圓圓為著pûn阿爸、阿姆安心,答應分手,但he kì-teû he真心相愛,根本mò想oi分開,兩儕人偷偷仔繼續聯絡。圓圓本旦yû異靚異靚ke長頭那毛,因為發病oi化療,mò辦法強留下來,陳風tî kiâ心事,故所挑挑lâu頭那毛留長,kì想oi做假頭那毛送pûn kì,pûn kì歡喜,鼓勵kì對抗病魔。陳風kiâ爸、kiâ姆恅著陳風he受著分手ke打擊,正會開始留長頭那毛,就隨在kì去,mò阻擋,ya mò懷疑。為著兩儕做得共下,陳風在學校從來m̀識講過自家yû女朋友。

  「兄弟,莫同別人講喔!」陳風揇等圓圓,看起來當幸福,ngài m̀-tî仰仔,目汁跌下來!

  「仰仔nò?」Kì兩儕pûn ngài嚇著。

  二月天,春天還當遠,風吹啊過來,分人試著異寒。

  Ngài mò應kì,臥頭看天。

  後來,換ngài開始留起長頭那毛。