《客語白話字聖經試讀版》

 | | | 轉寄

Mâ-thai Fuk-yîm, Thi-3-tsông_1, Sṳ̂-sé Yok-hon ke Tshòn-tho

作者 Hak-ngî Sṳn-kîn 2010.02.07

3:1 Ke-sṳ̀, hàng sé-lî ke Yok-hon tshiu lòi-to Yù-thai ke khóng-yâ tshòn-tho, kóng :
3:2 “Ngì-têu yin-tông oi hi-tshie̍t tshui-ok, yîn-vi thiên-kuet voi sṳ̍t-hien lè.”
3:3 Yok-hon tsit he siên-tî Yî-soi-â só kóng ke ngìn; Kì-kóng: Tshai khóng-yâ yû ngìn hêm kóng : “Oi tsún-phi Tsú ke lu,siû-tshi̍t Kì só oi hàng ke se-lu.”
3:4 Yok-hon tsok-tén lo̍k-thò-mô tso ke sâm-fu, yêu-khiên thak-tén phì-tai; sṳ̍t tshó-máng lâu yâ-me̍t ko ngit-è.
3:5 Ke-sṳ̀ Yâ-lu-sat-lâng , Yù-thai tshiòn-thi, lâu Yok-tán-hò yit-tai thi-fông ke ngìn, tu tshut-lòi tshiu-khiun Yok-hon;
3:6 Kì-têu sṳ̀n-ngìn tshṳ-kâ ke tshui, Yok-hon tshai Yok-tan-hò vi kì-têu sé-lî.
3:7 Yok-hon khon-tó Fap-li-soi-ngìn lâu Sat-tû-kâi-ngìn ya lòi tshîn-tshiu kì hàng sé-lî, tshiu tui kì-têu kóng : “Ngì liá-têu thu̍k-sà â ! Song-ti ke sṳ́m-phan voi to lé, ngì-têu láu-tó sám-tet-khôi mâ?
3:8 Tsúng-he oi yung hang-vì lòi tsṳn-mìn ngì-têu yí-kîn fí-kói.
3:9 M̀-hó tshṳ-kâ sióng kóng, Ngài-têu yû Â-pak-lâ-hón tso tsú-fu,tshiu mien-su sṳ́m-phan. Yîn-vi Ngài lâu ngì-têu kóng, Song-ti nèn tui liá-têu sa̍k-thèu vi Â-pak-lâ-hón tsho-tshut tsṳ́-sûn.
3:10 Liá-ha pú-thèu yí-kîn piong tshai su-thèu-táng lô, só-yî mò kiet hó kó-tsṳ́, tshiu tshiòn-phu tsám-thet, fit-lo̍k fó tî-poi.
3:11 Ngài tshiu yung-suí hiong ngì-têu hàng sé-lî, péu-sṳ ngì-têu fí-kói; m̀-ku tshai Ngài heu-poi lòi ke ngìn, khièn-li̍t kien-thai ko Ngài, Kì-ke hài-è Ngài ya mò tsṳ̂-kiet thoi Kì khuan, Kì yit-thin yung Sṳn-Lìn lâu fó vi ngì-têu hàng sé-lî.
3:12 Kì-ke sú nâ-tén pai-kî, oi kiet-tshiang Kì-ke ma̍k-tshon, tsiông ma̍k-é sû-ngi̍p tshông-khu, tsiông lùng-hông yung m̀-voi-me̍t ke fó lòi sêu-thet kì.”