《客語白話字聖經試讀版》

 | | | 轉寄

Yok-hon Fuk-yîm, Thi-19-tsông_0 Yâ-sû Pûn Ngìn Vú-yu̍k

作者 Hak-ngî Sṳn-kîn 2009.09.20

約 19:1 Só-yî Pí-lâ-tô tshiu ha-lin piên-tá Yâ-sû.
約 19:2 Pîn-é yung net-è phiên yit-táng miên-liù tai tshai Kì-ke thèu-nà-táng,yu lâu Kì tsok tsṳ́-set ke tshòng-phàu.
約 19:3 Kì-têu tshiu hàng-tshièn lòi tui Kì kóng: “Yù-thai-ngìn ke vòng â ! Van-soi!” Tshiu yung pâ-tsóng sân Kì.
約 19:4 Pí-lâ-tô yu tshut-hi tui tsung-ngìn kóng: “Khon â! Ngài tai Kì tshut-lòi tshiu-khiun ngì-têu, pûn ngì-têu tî ngài tshà-m̀-tshut Kì yû mak-ke tshui.”
約 19:5 Yâ-sû tai net-è ke miên-liù, tsok tsṳ́-set ke tshòng-phàu, tshiu tshut-lòi. Pí-lâ-tô tui kì-têu kóng: “Ngì-têu khon liá-ke ngìn !”
約 19:6 Só-yî tsung-tsi-sṳ̂-tsóng lâu vi-pîn yit khon-tó Yâ-sû, tshiu ham kóng: “Tsiông Kì tâng sṳ̍p-sṳ-ka, tsiông Kì tâng sṳ̍p-sṳ-ka,” Pí-lâ-tô tui kì-têu kóng: “Ngì-têu tshṳ-kâ tai Kì hi tâng sṳ̍p-sṳ-ka; yîn-vi ngài tshà-m̀-tshut Kì yû mak-ke tshui.”
約 19:7 Yù-thai-ngìn en kì kóng: “Ngài-têu yû yit-thiàu li̍t-fap, tseu ke-thiàu li̍t-fap, Kì he kôi sí, yîn-vi Kì tshṳ-tshṳ̂n he Song-tsú ke Lai-é.”
約 19:8 Pí-lâ-tô yit thâng-tó liá-ke fa, tshiu ye̍t kiâng;
約 19:9 Yu to-tsón-hi tsúng-tuk-fú, tui Yâ-sû kóng: “Ngì to-tái he tshiùng nai-vi lòi?” Tsúng-he Yâ-sû mò en kì.
約 19:10 Pí-lâ-tô tshiu tui Kì kóng: “Ngì m̀ en ngài mà? Ngì kám-kóng m̀ tî ngài yû khièn hó piong Ngì, ya-yû khièn hó tsiông Ngì tâng sṳ̍p-sṳ-ka?”
約 19:11 Yâ-sû en: Na m̀-he Song-tsú su liá khièn-piang pûn ngì, ngì tshiu mò khièn hó lòi phan Ngài, só-yî tshut-mai Ngài pûn ngì-ke ngìn, kì-ke tshui hàn kha tshûng.”
約 19:12 Pí-lâ-tô thâng-tó liá-ke fa tshiu ye̍t sióng-oi piong Kì, m̀-ku Yù-thai-ngìn ham kóng: “Ngì ká-sṳ́ piong liá-ke ngìn, ngì tshiu m̀-he Fòng-ti ke phèn-yû, só-yû tshṳ-tshṳ̂n tso vòng ke ngìn, tshiu-he Fòng-ti ke thi̍t-ngìn.”
約 19:13 Pí-lâ-tô yit thâng-tó liá-ke fa, tshiu tai Yâ-sû tshut-lòi khôi-thìn sṳ́m-mun, tshô tshai Sa̍k-kâi, (Hî-pak-lòi-fa ham-tso Kâ-pâ-thâ.)
約 19:14 Ke-ngit he Yì-ye̍t-tsiet ke tshièn-yit-ngit, thai-yok he lìm-tông-tsu, Pí-lâ-tô tshiu tui Yù-thai-ngìn kóng: “Khon-â ! Ngì-têu ke vòng !”
約 19:15 Kì-têu tshiu ham kóng: “Tshù-thet Kì, tshṳ̀ sí Kì, tâng Kì.” Pí-lâ-tô tui kì-têu kóng: “Tsiông ngì-têu ke vòng tâng sṳ̍p-sṳ-ka mâ?” Tsung- tsi-sṳ̂-tsóng en kóng: “Fòng-ti tsṳ̂-ngoi ngài-têu mò vòng.”
約 19:16 Yîn-vi án-ngiòng. Pí-lâ-tô tshiu tsiông Yâ-sû tshut-mai pûn kì-têu, hi tâng sṳ̍p-sṳ-ka.