《客語白話字聖經試讀版》

 | | | 轉寄

Má-thai Fuk-yîm thi 21 tsông_04 Tsṳt-mun Yâ-sû ke Khièn-piang

作者 Hak-ngî Sṳn-kîn 2012.09.09

21:23 Yâ-sû ngi̍p Sṳn-thien, tshai ke kau-hiun ngìn ke sṳ̀-heu, tsi-sṳ̂-tsóng lâu mìn-kiên ke tsóng-ló lòi kien Kì, mun kóng : “Ngì he yung mak-ke khièn-piang lòi hàng liá-têu sṳ? Tsúng-he liá-ke khièn-piang he má-ngìn pûn Ngì nò?”
21:24 Yâ-sû tui kì-têu en kóng: “Ngài siên mun ngì-têu yit-ki fa, ká-sṳ́ ngì-têu kóng pûn Ngài tî, Ngài tshiu tsiông Ngài yung mak-ke khièn-piang hàng liá-têu sṳ lòi kóng pûn ngì-têu tî.
21:25 Yok-hon hàng sé-lî ke khièn-piang he tui nai-vi lòi? He tui Song-tsú, fe̍t-he tui ngìn nò? Kì-têu tshiu pí-tshṳ́ tshâm-siòng kóng: “Ngài-têu ká-sṳ́ he kóng : ‘Tui Song-tsú lòi ke,’ Kì yit-thin voi tui ngài-têu kóng : ‘Tsúng-he, ngì-têu ngióng-pân m̀ sin Yok-hon nò?’
21:26 Na-he kóng, ‘Tui ngìn lòi ke’; ngài-têu yu kiâng tsung-ngìn voi tui-fu ngài-têu; yîn-vi tsung-ngìn khon Yok-hon he siên-tî.”
21:27 Kì-têu tshiu tui Yâ-sû kóng: “Ngài-têu m̀ tî.” Yâ-sû ya tui kì-têu en kóng : “Ngài ya m̀ kóng pûn ngì-têu tî, Ngài yung mak-ke khièn-piang lòi hàng liá-têu sṳ.”