《油桐花ke思念》

 | | | 轉寄

ku-hiông...故鄉

作者 Hiû Yit-fàm....邱一帆 2010.06.13

Chhiâng-sân liu̍k-súi
青山綠水
yung kì chhîn-chhiet ke choi-mâ
用佢親切ke喙碼
se-sîm mun-heu
細心問候
Chhó-mi fâ-hiông
草味花香
yung kì ke vûn-yiù ke seu-yiùng
用佢ke溫柔ke笑容
se-ngi cheû-fû
細義招呼

Thò ku-hiông ke thiên-táng-kô
Thò故鄉ke天頂高
yû mung-sióng ke ngie̍t-ngiòng
有夢想ke月娘
hi piên-chṳt vi-lòi ke ngìn-sên
去編織未來ke人生
Thò ku-hiông ke thi-nài mien
Thò故鄉ke地泥面
yû sat-mâng ke hiông-chhîn
有殺猛ke鄉親
lòi vàn-sṳ̀n kâ-yèn ke lî-sióng
來完成家園ke理想

Tan-he chúng yû ngìn voi mun
但he總有人會問
ku-hiông ti nai-vi
故鄉ti奈位
Vuk-yàm-tiâu kóng
屋簷鳥講
chhiu ti ngì theù-nà tûng-hí ke tiên-táng-kô
就ti你頭林崠起ke天頂高

Tan-he chúng yû ngìn voi mun
但he總有人會問
ku-hiông ti nai-vi
故鄉ti奈位
Thièn-lo-chhú kóng
田老鼠講
chhiu ti ngì lióng-kiok tha̍p-tén ke thi-nài-mien
就ti你兩腳踏等ke地泥面

Tan-he chúng yû ngìn voi mun
但he總有人會問
Ku-hiông ti nai-vi
故鄉ti奈位
Kiú-kong-fûng kóng
九降風講
chhiu ti ngì theú-chhut-theú-ngi̍p ke khiông-hi chûng
就ti你敨出敨入ke空氣中