《戀戀台灣客家文學》

 | | | 轉寄

小說：〈戀〉(4)

作者 Suingi 2019.12.15

　　「你yû ngióng-è mò？頭那毛留án長，本旦就yi危險，thak起來正好。高三學長解下手指項ke頭那毛，鼻咧一下，lâu kì收入褲袋仔。

　　六月ke芥菜——假yû心！

　　Ngài向前想打kì，陳風阻擋ngài：「承蒙學長ke關心！」

　　「啊！」一擺兩擺三擺！評判先生大細心！學長緊犯規sa mò事情！陳風跌倒咧！比賽暫停，ngài lâu kì kô藥仔。

　　「學長ngióng做得án-nè！」ngài譴腸閼胗！

　　「哈哈！」陳風大笑：「正經當痛耶！你kô thióng大力le！」

　　「這比賽m̀公平！」

　　「哈哈！Mò相干啦！打球歡喜就好！」

　　歡喜？M̀公平个比賽，ngióng會歡喜？想著高三學長看陳風ke目神，還yû該變態動作，閼死人正得！

　　繼續比賽，mò幾久，比賽就結束，高三學長kì-teû贏咧！

　　「陳風，ngiâ頭那毛還香！」高三學長鼻等剛下打球強拉下來ke頭那毛，風神哎哎ke離開。

　　陳風mò講mak-kai，ngài想打學長，又pûn kì阻擋下來：「啊結束咧！Ên去sṳ̍t冰！」

　　「陳風，你做麼oi阻擋ngài！」食冰食冰食mak-kai冰！Liá-ha kì還sṳ̍t-è-lo̍k！

　　過了幾日，神奇ke事情發生le！班際籃球賽獎狀sa變ên拿著。該變態學長mò ko出現，聽講he pûn人打to ngi̍p-yen，網路罵學長罵to校長oi出來處理。

　　「承蒙校長。」陳風上台領獎，笑笑仔，該長長ke頭那毛隨風揚起，校長看起來面紅紅仔。

　　「兄弟！Sṳ̍t冰！」陳風笑笑仔，湊大家放學好好慶祝。Ngài想問kì，又m̀-tî oi問mak-kai，陳風像一開始就tî結果咧！