《客語白話字聖經試讀版》

 | | | 轉寄

Má-thai Fuk-yîm thi 25 tsông_03 Tsui-heu ke Sṳ́m-phan

作者 Hak-ngî Sṳn-kîn 2013.02.03

25:31 “Tong Ngìn-tsṳ́ tshai Kì-ke yùng-kông lâu tsung-sṳ́-tsá thùng Kì khiung-ha ke sṳ̀-heu, Kì oi tshô tshai yùng-kông ke pó-tsho-táng.
25:32 Van-mìn tshiòn-phu oi tshi-si̍p tshai Kì mien- tshièn, Kì tshiu tsiông kì-têu pûn-tso lióng-khiùn, tshiong tsóng-yòng ke ngìn tsiông mièn-yòng tui sân-yòng-tsûng pûn-khôi-lòi án-ngiòng.
25:33 Kì oi tsiông mièn-yòng piong tshai yu-phién, sân-yòng tshiu piong tshai tsó-phién.
25:34 Vòng tshiu-oi tui tshai Kì yu-phién ke ngìn kóng : ‘Ngì-têu tet-tó Ngâ Pâ su-fuk ke ngìn, hó hàng- tshièn-lòi sṳ̀n-su tui tshóng-tsho sṳ-kie yî-lòi tshiu vi-tsho̍k ngì-têu só tsún-phi ke kuet.
25:35 Yîn-vi Ngài tú-kî, ngì-têu pûn Ngài sṳ̍t; Ngài tsoi-tsâu, ngì-têu pûn Ngài lîm; Ngài tshut-ngoi liù-long, ngì-têu tshiu tsiap-na̍p Ngài;
25:36 Ngài tá-tshak-pok, ngì-têu tshiu pûn Ngài tsok; Ngài pot-phiang, ngì-têu tseu-ku Ngài; Ngài tshai tshô-kón-è, ngì-têu lòi khon Ngài.’
25:37 “Ke-têu ngi-ngìn tshiu en Kì kóng : ‘Tsú â ! Ngài-têu tshai kí-sṳ̀ khon-tó Ngì tú-kî, tshiu pûn Ngì sṳ̍t; Ngì tsoi-tsâu, tshiu pûn Ngì lîm?’
25:38 Yu tshai kí-sṳ̀ khon-tó Ngì tshut-ngoi liù-long, tshiu tsiap-na̍p Ngì; Ngì tá-tshak-pok, tshiu pûn Ngì tsok?
25:39 Yu tshai kí-sṳ̀ khon-tó Ngì pot-phiang, fe̍t-tsá tshai tshô-kón-è, tshiu lòi tseu-ku Ngì nò?’
25:40 Vòng yit-thin oi tui kì-têu kóng : ‘Ngài sṳ̍t-tshai lâu ngì-têu kóng, ngì-têu yí-kîn yû hàng liá-têu sṳ tshai Ngài-ke-têu hiûng-thi sṳ̂n-song, tshiu-he hàng liá-têu sṳ tshai Ngài sṳ̂n-song!’
25:41 “Yèn-heu,vòng yu oi tui Kì tsó-phién ke ngìn kóng: ‘Ngì-têu su tsu-tsú ke-ngìn, hó lì-khôi Ngài, ngi̍p-hi ke vi-tsho̍k Mô-kuí lâu kì-ke tsáu-ngà só tsún-phi yún-yén put-me̍t ke fó tî-poi !
25:42 Yîn-vi Ngài tú-kî, ngì-têu mò pûn Ngài sṳ̍t; Ngài tsoi-tsâu, ngì-têu mò pûn Ngài lîm;
25:43 Ngài tshut-ngoi liù-long, ngì-têu mò tsiap-na̍p Ngài; Ngài tá-tshak-pok, ngì-têu mò pûn Ngài tsok; Ngài pot-phiang,ya-he tshô-kón-è, ngì-têu ya mò tseu-ku Ngài.’
25:44 “Ke-sṳ̀, kì-têu tshiu en Kì kóng : ‘Tsú â ! Ngài-têu tshai kí-sṳ̀ khon-tó Ngì tú-kî,ya-he tsoi-tsâu, ya-he tshut-ngoi liù-long,ya-he tá-tshak-pok, ya-he pot-phiang,ya-he tshô-kón-è, mò fu̍k-sṳ Ngì nò?’
25:45 Kì tshiu en kì-têu kóng : ‘Ngài sṳ̍t-tshai lâu ngì-têu kóng ,ngì-têu tông-tsûng mò hàng liá-têu sṳ, m̀-hén pông-tshu ngìn, tshiu-he mò hàng liá-têu sṳ lòi pông-tshu Ngài.’
25:46 Liá-têu ngìn oi su yún-yén ke hìn-fa̍t; tsúng-he ke-têu ngi-ngìn tshiu-oi tet yún-sên.