《客語漢羅聖經試讀版》

 | | | 轉寄

馬可福音第六章_03施洗約翰過身

作者 客語聖經 2014.03.02

6:14希律王就聽到關係耶穌一切ke事，因為耶穌ke名聲傳到逐所在；就有人講：「行洗禮ke約翰返生，故所差遣他來行這teû神蹟。」

6:15有別人講：「他係以利亞。」也有別人講：「係先知，像古時代ke先知。」

6:16希律聽到就講：「被我斬頭ke約翰返生lé !」

6:17因為希律識喊人去捉約翰，將他斬掉，關在監獄肚，係為著希羅底；因為希羅底係希律ke兄弟腓力ke pû娘，總係被他佔來做pû娘。

6:18約翰識lâu希律講：「你佔兄弟ke pû娘係m̀合法ke !」

6:19故所，希羅底就怨恨約翰，想oi殺他；總係無機會；

6:20因為希律知約翰係正直聖潔ke人，就敬重保護他。希律逐擺聽到約翰講ke話，就照行；總係又歡喜聽他講論。

6:21希羅底所等ke機會到lé.。希律在他生日設席，請ke-teû文武百官lâu加利利民間ke領袖；

6:22筵席中，希羅底ke妹仔入來跳舞，希律lâu人客盡歡喜；希律王就lâu細阿妹仔講：「大凡你所oi ke,我就會賞pûn妳。」

6:23希律又發誓講：「大凡妳所求我ke, 就係我ke一半江山，我也會pûn妳！」

6:24細阿妹仔出去問kiâ阿姆，講：「我oi求má-ke ?」Kià阿姆應講：「施洗約翰ke頭那。」

6:25細阿妹仔入來見王，求講：「我oi你即時將施洗約翰ke頭那放在盤肚來pûn我！」

6:26王聽到這個請求就十分為難；總係已經在人客面前發誓，就無法度拒絕這細阿妹仔ke請求。

6:27王即時派一個衛兵去拿約翰ke頭那來。衛兵就去監獄，斬他ke頭那；

6:28頭那就放在盤肚，拿來pûn細阿妹仔看；她就交pûn kiâ姆。

6:29 約翰ke門徒聽到，就來將約翰ke身屍領走，葬在墳墓底背。