《客語漢羅聖經試讀版》

 | | | 轉寄

馬可福音第五章_02葉魯ke妹仔lâu血漏婦人家

作者 客語聖經 2014.02.09

5:21耶穌又坐船到湖ke片，有一大群人來親就祂。

5:22看啊！有一個會堂ke管理員，名安到葉魯，她也來；她一看到耶穌，就伏在祂ke腳前，

5:23求祂講：「我ke妹仔病到會死，請祢來摸她ke手，使她得醫好，救她一命！」

5:24耶穌lâu她共下去；有一大群人也thèn著祂去。

5:25有一個婦人家，發血漏病十二年，

5:26看過盡多醫生，在他teû ke手下受盡多ke苦，她所有ke錢財也用掉去，她ke病無醫好，反轉較嚴重lé.

5:27她識聽過耶穌ke事，她尖在人群中，行在耶穌ke後背，就摸祂ke衫。

5:28因為她想：「我假使摸到祂ke衫，就一定得醫好。」

5:29婦人家ke血漏就停止，感覺自家身上ke病已經好lé.

5:30耶穌即時知有能力從祂ke身上出去，就在眾人中間轉身過來，講：「Má人摸我ke衫喏？」

5:31 Kiâ門徒就lâu祂講：「祢看眾人尖著祢，祢還問：『Má人摸祢』？」

5:32耶穌四面緊看，má人摸祂。

5:33婦人家知自家身上所發生ke事，驚到悸悸顫，就來跪落在耶穌面前，照實講pûn祂知。

5:34耶穌lâu她講：「妹仔啊，妳ke信心救到妳；好安心轉去，妳ke病得醫好lé.」

5:35耶穌還在該位講話ke時候，有人從會堂管理員ke屋下趕來，講：「妳ke妹仔死掉lé,還oi勞動先生nè?」

5:36耶穌m̀管他所講ke話，就lâu管會堂ke管理員講：「M̀使驚，單單oi信！」

5:37然後祂帶著彼得、雅各，lâu雅各ke老弟約翰共下去，m̀肯別人thèn著他teû去。

5:38他teû來到會堂管理員ke屋下，耶穌看到大家亂糟糟，有人大聲緊哭。

5:39耶穌入去就lâu他teû講：「你teû ngióng般亂糟糟大聲緊哭喏？細人仔無死，在睡目定定。」

5:40眾人就笑祂。總係耶穌將眾人逐出去，帶細人仔ke爺ôi, lâu thèn祂來ke三個門徒入去細人仔ke房間。

5:41耶穌就牽著細阿妹仔ke手，就lâu她講：「大利沙，古米！」意思就係講：「細阿妹仔啊，我命令妳起來！」

5:42細阿妹仔即時就起來行；因為這個事，使大家非常希奇！

5:43耶穌嚴嚴禁止他teû，m̀好pûn別人知這個事；又吩咐拿東西pûn細阿妹仔食。