《江秀鳳散文專欄》

 | | | 轉寄

玉春

作者 江秀鳳(四縣腔) 2018.08.26

　　還記得鄰舍有一ke細妺仔安到玉春，he kiâ屋下ke單生女，該央時kì正四、五歲，kiâ爺哀開工廠，逐日做到mò日mò夜，kì逐朝晨坐幼稚園ke車仔去讀書，下課轉來就拿掛到頸根ke鎖匙開門，書包仔放忒，就行到門碫下坐，看別人ke爺哀牽等細人仔轉屋，yû人騎自行車載子女下課，me yû騎ò-to-pái接轉來ke，玉春目珠圓盯盯當欣羨。

　　臨暗時節，巷仔he細人仔ke遊樂場，大家就走出來搞，成時囥人尋、跳格仔、撥索仔，搞到食飯時間咧，正pûn爺哀喊轉去。Ngài聽著kì-teû在門背搞到大嫲聲，ngà姆yû吩咐，轉到屋oi先寫作業，作業寫忒正做得出去搞ya-he看電視，故所ngài同阿姐做m̀得一下課就出去尞。一隻一隻細猴仔pûn阿姆喊轉去食飯了，玉春一儕人孤孤栖栖又坐轉kiâ門口碫仔項，坐到斷烏半夜，kiâ爺哀me màng轉來。

　　事情過當久，正pûn ngà姆知著，對該日起勢，ngà姆下班轉來，就去喊玉春入來ngà屋下，輒輒看kì頭那毛繷頭絞髻，面屙糟嗒滴，ngà姆就拿一條新面帕lâu kì洗面洗手，專門pûn kì用，喊ngài兩姐妹oi好好照顧kì，ngài三儕共下看電視，等ngà姆飯菜煮好，就lâu kì共下食飯。

　　Ngà姆規定ngài兩姐妹，九點就oi上眠床睡目，逐擺ngài-teû去睡目ke時節會lâu玉春講暗安，玉春用欣羨ke大目珠看等ngài兩姐妹上樓頂，ngà姆日日就等到十點、十一點，下把仔等到轉點，玉春ke爺哀還màng下班，ngà姆自家oi上班，又oi洗碗筷、洗衫褲、晾衫，日日等到án暗me tú-m̀-tiâu，下後ngài-teû睡目ke時節，ngà姆就喊玉春用鎖匙開門入去kì自家屋下等，ngà姆lâu kì講án暗吔，m̀好坐到門碫下，忒危險。

　　Ngà姆還he m̀放心，輒常等到kiâ爺哀轉來，正睡得落覺，玉春ke爺哀做事做到兩頭烏，連禮拜日me渡等玉春去工廠，罕得看著kì兩公婆，算起來mò yi熟識，kiâ屋下he仰般ke家庭me mò詳細，想著玉春衰過ke童年，m̀知kì大吔會變到麼个款ke人，這下過來好mò？

　　2018.5.23在台中55路公車頂