《江秀鳳散文專欄》

| | | 轉寄

拗枉

逐儕人都共樣,一生人盡惱pûn人拗枉,自家有做差,pûn人駡、pûn世大人打就mò相干,pûn人拗枉正經會閼死。

  還細時節,有一個好朋友生日,該央時當時行溜溜球,ngài去店肚尋著一粒mò打價數ke,想講送人東西打價數mò禮貌,拿到櫃台續pûn頭家娘駡,kì拗枉ngài lâu價數擘忒,本來當譴,mò想oi lâu kì買,m̀過斷烏仔,tai太平算kha庄下,屋下附近yu mò別間店,朋友天光日生日,mò奈何還he lâu kì買,這m̀-he麼該大事情,m̀過pûn人拗枉心肝就會艱苦,貼貼記到這下,就m̀會m̀記得。

  頭擺ke公車,在運轉手脣項有一隻箱仔oi pûn人放銀角仔做車錢,he mò銀角仔,多放kì me m̀會找錢,he正經mò零星,me識看人放一張一百個銀,放一百個銀me mò人會lâu你講恁仔細。

  Yû一擺坐公車,過紅青燈就oi下車仔,ngài lâu錢放到箱仔肚,車仔堵堵好停紅燈,過mò一分鐘,ngài oi下車ke時節,運轉手硬硬講ngài mò放錢,ngài明明就有放,還誆誆滾有聲,緊同司機解釋,kì還he大嫲聲緊咄,歸車頂ke人都緊看ngài,該央時正經當閼,仰恁衰會堵著這種司機,相信坐到頭前ke人me有看著ngài yû放錢,仰會mò半儕人yû義氣,代ngài講一句話?

  該擺he ngà姆喊ngài去阿姨屋下送禮,m̀記得he麼該年節,這隻司機還孤毛,me mò想ngài he細人仔,佢講mò放錢就m̀ pûn ngài下車,車門me m̀開,高不將再㧹一擺錢,正開門pûn ngài下車,pûn人拗枉yu譴yu瀉面子,閼到會死。好得吾姆逐擺交代ngài出門ya-he買東西就會加拿錢pûn ngài,兼怕m̀罅會害ngài為難。

  Yû一擺跈阿姆共下去看厥降嬰兒仔ke朋友,該時代lín-kó貴參參仔,該間生理當好,人盡多,ngà姆買5粒lín-kó,使忒三百零銀,稱好斤兩撿忒錢,吂行到店外,頭家就大嫲牯聲咄:「該隻著青衫ke太太,你yû撿錢mò?」ngài lâu ngà姆斡轉頭看he麼儕買東西mò撿錢,mò想著頭家用蛇頭指緊剷ngà姆:「就he你、就he你,你yû撿錢mò?」ngà姆行倒轉去好聲好氣lâu頭家講:「Yû撿錢,m̀信你稱看哪,這總共幾多斤,ngài撿忒幾多錢,你自家稱看哪著m̀?」頭家lâu油紙袋仔大大力搶過去,稱頭稱一下,lâu ngà姆講ke共樣共樣,就攉還吾姆,一句失禮就mò講,ngài看到tú-m̀-tiâu:「做生理人恁惡,yu恁mò禮貌,自家拗枉人,連會失禮就mò,下二擺ngài-teû絕對m̀會過來若店項買東西哩!還魯夫ke生理人。」

  講忒,ngà姆牽等ngà手,定定仔行過當多人客面前過,這擺大家sa用當尊敬ke眼光看ngài,代阿姆出一口氣,ngài me試著盡風神。

  2018.5.9台中55路公車頂