《善雄牧園》

 | | | 轉寄

亞伯拉罕ke信心（試煉）—信仰ke試煉(3)(修訂版)

作者 邱善雄 2012.09.16

亞伯拉罕因為順從上帝ke話oi獻以撒，上帝就備羔羊來代替。

當亞伯拉罕四人在第三日到亞摩利地時，亞伯拉罕就對ke二位後生ke奴僕講：「你teû在lia片等一下，我lâu以撒去ke敬拜結束就轉來你teû liá片，亞伯拉罕就將燔祭ke放在他ke子以撒身hong, 自家ke手擎火lâu刀仔，ke時二人就同行，tui liá段使ên-teû明白亞伯拉罕ke決意，假使ke時亞伯拉罕pûn二位後生人t係ǹ去，獻祭ke事定著會失敗，因為ke二位後生假使看到亞伯拉罕oi 弒子，定著會去搶奪，m̀會pûn父弒子，ku-só亞伯拉罕係有決心，m̀會pûn後生人then來。

亞伯拉罕有決心oi獻以撒pûn上帝，ku-só凡是燔祭所oi用ke柴刀lâu火全部準備，造成他無任何做得推辭ke話。在liá段ên-teû也看出以撒十分順服阿爸，他恬恬背柴thèn阿爸行，m̀-ku他有感覺奇怪ke 係，假使oi獻祭，án-ngiòng無帶羊喏？Ku-só就問阿爸講：「你看！火lâu柴都有，m̀-ku燔祭ke羊在nai位？」亞伯拉罕en kóng：「我ke子，上帝oi自家準備燔祭ke羊。」以撒也順服聽阿爸ke話，無再講一句話就khiung-ha行到上帝所指示ke地方。

到ke地方亞伯拉罕就築壇將柴排好，並綁他ke子以撒，就擎刀oi 弒他ke子以撒；對liá片ko pûn ên-teû明白以撒有完全順服lâu孝心，因為在pûn亞伯拉罕綁時都無任何呼救或反抗，假使以撒想oi反抗定著m̀會pûn亞伯拉罕綁，因為亞伯拉罕已經有歲lè, m̀-ku以撒無反抗，以撒m̀係憨，m̀知死活，liá係因為他有順從天父lâu阿爸，ku-só任憑阿爸去做，在liá教示ên-teû為人子女者oi聽爺ôi言，順從爺ôi，你看以撒順從爺ôi亞伯拉罕，就幫助父完成克服liá重大ke試煉；還有做爺ôi ke人oi有好ke品行，信仰ke生活lâu完全順從父上帝ke話，你ke子女也定著會像án-ngiòng來順從父上帝lâu你，時常聽人講一句：「有其父必有其子」liá句話實在無m̀對。

Ên-teû再繼續看，當亞伯拉罕擎刀oi 弒以撒在ke chhin危急時，忽然有上帝ke使者出聲講：「你做m̀得在liá-ke細人仔ke身上下手，也做m̀得對他án-ngiòng做，因為我知你係敬畏上帝，也m̀將你ke子留下。」當亞伯拉罕在受試ke最尾關頭，就像無希望時，信實ke上帝果然，代亞伯拉罕開一條脫出ke路，就係準備羔羊來代替以撒，上帝實在無絕人ke路，在liá ên-teû也做得看出，表明上帝將祂獨一ke羔羊就係主耶穌基督獻在柴壇hong, 流血為ên-teû ke罪來替贖。

最尾ên-teû來看亞伯拉罕所逢到ke試煉結果係án-ngiòng, ên-teû都明白亞伯拉罕有大ke信心來勝過liá種艱苦ke試煉，他有順從上帝ke命令，愛上帝過於愛子，ku-só最尾上帝有賜福氣pûn他，聖經記耶和華講：「我賜福oi賜福你，加添oi加添你ke後裔，像天上ke星，海邊ke沙，你ke後裔oi得到福氣，因為你聽從我ke話。」各位兄姐，你有聽上帝ke話無？Tui liá下起ên-teû oi立志，順從父上帝ke旨意，勇敢lâu用堅定ke信心來迎接克服上帝所oi pûn ên-teû種種信仰ke試煉，假使án-ngiòng你就oi得到上帝最尾所賜ke福氣。A-men