《善雄牧園》

 | | | 轉寄

好ke選擇(3) (修訂版)

作者 邱善雄 2012.02.12

Ên-teû再來看馬太為到姊妹，馬利亞安靜在主ke面前聽主ke教示就嫉妒不平，liá就係馬大ke大弱點，她看見自家ke姊妹安靜在主ke面前聽道理，又看見自家為主耶穌來無閒，就chhin m̀甘願，ku-só對主講：「只有我自家一人在做，祢無要緊嗎？」Liá係出於嫉妒ke心來吐出ke心裏話，ên-teû信徒中也時常有人看到別人在熱心敬拜上帝，聽主ke道理，就嫉妒講：「哼！假熱心，假冒偽善，假善ke法利賽人，liá實在係m̀對ke事。有時ên-teû也會逢到像馬太lâu馬利亞ke情況，只有看自家為主ke教會sat-mâng工作，就不平別人m̀做，假使án-ngiòng ên-teû就m̀ 係真實服侍上帝ke人了。」Ku-só ên-teû oi存真實、虔敬ke心靈來敬拜上帝，做m̀得存有嫉妒、虛偽ke心來拜父，因為liá係上帝所厭惡ke.

有好ke選擇，做m̀得只有看眼前，就係oi看永遠性。

舊約時代有以掃lâu雅各二兄弟，m̀-ku阿哥以掃因為重眼前ke一碗紅豆湯來失去他長子ke名分，只有看重眼前ke選擇係 yit危險；ku-só, 人假使只有選擇眼前一時ke享福，就oi失去他永遠ke福氣，tiên-tó來講，ên-teû也做m̀得為眼前一時ke慘境來喪失生命，使到 ên-teû做m̀得入天國。

主耶穌也有教示，ên-teû選擇ke眼光oi看ko遠一sit, 就係主教示ên-teû oi好ke選擇，做m̀得只有看眼前好ke, ke門、ke道chhin大又闊，人多又chhin鬧熱，就選擇ke條，來棄捨ke條人少ke狹門，m̀-ku主耶穌明確教示ên-teû oi對ke條狹門入去，因為ke條chang 係真實通到活ke路，ku-só ên-teû在選擇時，絕對做m̀得看眼前，oi看到上帝ke國，liá種選擇，chang 係好ke選擇。

最尾，ên-teû來看主耶穌對馬大所講ke話係mak-ke? 當馬大對耶穌講出不平她姊妹ke話時，主有en講：「馬大阿！馬大阿！你為著liá-teû事情來掛慮敢對，你所欠用ke就係 ke,因為馬利亞已經揀到好ke福份，就做m̀得lâu她搶」。各位兄姐，你敢係像馬大為到世事來掛慮，做m̀得得到上帝ke殿用安靜、誠實、謙卑lâu清心來到主ke面前，聽主ke教示，假使係án-ngiòng, 主也oi用同樣ke話來lâu你講：「某人阿！某人阿！你為著liá-teû事情來掛慮敢對，你所欠用ke就係ke項。」你做m̀得看輕所欠用ke項，因為ke項係你ke致命傷，關係你ke得救lâu滅亡，ku-só ên-teû在禮拜日做m̀得pûn世事來打擾ên-teû使到失去好ke福份，在禮拜日oi放棄所有世事，像馬利亞坐在主ke面前，聽主ke話，ên-teû假使án-ngiogn3,所得到ke福份，無人做得lâu ên-teû搶，因為主ke話係靈係生命。

Ên-teû已經選到福份ke人，oi繼續追求主ke真道，抓緊主，做m̀得棄捨信仰生活，每日oi有神聖ke表現，ên-teû做基督徒對人最大ke阻礙就係 ên-teû ke日常生活無表現真實信徒ke行為，使到阻擋chhin多人做m̀得入天國，實在chhin慘，因為ên-teû無時常選擇信仰生活來約束ên-teû, ên-teû ke教會m̀振興，實在係 ên-teû信徒無時常有好ke選擇造成ke,ku-só希望ên-teû在日常生活，oi有好ke選擇，做主真實ke子女，án-ngiòng ên-teû chang做得榮光主ke聖尊名。A-men