《客家消息》

| | | 轉寄

轉載:六堆庄頭劇場

  六堆300年系列壓軸活動「六堆庄頭劇場」四月九號(拜六)登場!客家委員會特別以社區參加方式,透過專業劇團邀請在地人挖在地故事lâu共下作戲,呈現九齣劇本、九個專業劇團、九組在地文化體驗團隊,二十七場沉浸式劇場,ti四月九號to五月十五號演出。客委會副主任委員鍾孔炤邀請大家共下來看戲,感受客庄藝文能量lâu六堆民眾熱情。

  二十七場演出北tui美濃高樹、南to佳冬新埤,各自展現了高屏特別ke六堆文化DNA。第一ke禮拜:四月九號lâu十號首演《八音Reunion》,he傳達兩代間ke矛盾lâu為家鄉盡力ke心意,me呼應ko團結ke社會運動精神;《阿莉莉尋魚記》由孩童擔網反串成人演出,期望在傳統lâu當代間展現孩童價值,me傳達lâu環境共融ke意思;《火燒庄》肚隆隆鼓聲lâu精勇ke武術動作,充滿視覺張力lâu聽覺震撼,帶出「抵抗」lâu「征戰」ke反思。

  第二ke禮拜:四月十六號lâu十七號演出《菸葉飯》展現客家務實lâu集體勞動ke歷史,因為世代轉換、轉型ke過程,傳達客家族群硬頸ke打拼精神;《頭擺頭擺,伯公講》講六堆伯公信仰ke多元,lâu對人開墾水源、討生活ke看顧;《埔之內》以多首原創歌曲lâu說書人,唱出穿越時空三百零年ke內埔故事。

  第三ke禮拜:四月二十三號lâu二十四號透過《天河通地頓物語》lâu二戰期間日籍軍人ke愛情故事融入劇本,pûn情感落腳竹田,回應轉運、聚集ke場域特性;《關》以文學家鍾理和先生ke作品,串連遭遇人生關卡ke主角lâu過去為著水源拼命討生活ke民眾,探討「族群」議題;《樂土》流動隱微ke愛情lâu親情,講著細阿妹、降子lâu阿姆ke味緒,表現細膩,反映當代兩性議題。

  第四ke禮拜:四月三十號tò第六ke禮拜:五月十五號,各戲行出原劇本場景,ti內埔天后宮、竹田六堆忠義祠、麟洛鄭成功廟、萬巒劉氏宗祠、美濃客家文物館lâu佳冬蕭宅各地演出,錯過前三禮拜現地演出ke人,還yû機會ko體驗六堆在地故事。

  客委會誠摯歡迎大家參加,共下見證六堆地區300年ke人文歷程,透過庄頭劇場yet開族群共存共榮lâu土地ke禮讚,詳情請to「六堆庄頭劇場」官方網站、粉絲專頁行行看看。


🔥六堆庄頭劇場
官方網站:https://www.liugduitheater.com/
粉絲專頁:https://www.facebook.com/liugdui300dna/