《客家消息》

| | | 轉寄

轉載:「傳頌六堆」動畫短片lâu企劃創作製作設計展

  客委會客家文化發展中心lâu實踐大學合作辦理「傳頌六堆」動畫短片同企劃創作製作設計展,liá-pái展示短片內容lâu原創設計he由ti美濃出世ke客家妹仔——實踐大學彭鳳珠教授策劃。彭教授從事動畫工作超過三十年,一直tu yû以動畫美學方式製作影片,來傳揚客家文化ke想法,liá-pái展出「傳頌六堆」意象短片he一個起點,影片中利用動畫繪製呈現高屏六堆12鄉區ke特色代表景點,結合六堆運動會比賽項目,展現一路里來六堆tu用共樣一種團結合作客家精神傳承。

  客委會客發中心主任何金樑表示,本次展出作品本旦he第五十六屆六堆運動會ke宣傳動畫,八分鐘ke影片要畫上萬零張ke圖稿正yû法度呈現出完美ke畫面,假使單淨用在配合運動會期間播放實在打爽,正會特別lâu彭教授合作規劃以展示方式呈現製作動畫過程lâu展示創作設計稿,好pûn大家看著該影片後背辛苦過程。Ko-lòi,為著活化六堆地區ke教育內容,推廣數位產業——動畫ke相關資訊lâu學習課程pûn六堆地區年輕學生仔,彭教授ya規劃三十六點鐘ke動畫營課程,短短時間帶領六堆學子共下製作一部動畫短片,客發中心表示,希望透過活跳ke動畫展pûn大家對六堆各鄉區文化特色yû還啊多認識。展出時間從110年八月七號to八月三十一號,歡迎大家來參觀,未來「傳頌六堆」意象短片ya會ti本中心「大武山下走相逐——六堆運動會特展」展場播出,歡迎共下來六堆園區行尞。