《客家消息》

| | | 轉寄

轉載:2021客家貢獻獎得獎名單

  第9屆「客家貢獻獎」歷經初審、複審lâu決審3階段ke嚴謹審查,選出9位得獎者,liá-teû榮獲全球客家盡高榮譽ke he「終身貢獻獎」ke徐正光教授lâu楊貴運博士;在傑出成就獎方面,he「研究發展類」ke蕭新煌博士;「藝術文化類」ke張芳慈女士lâu黃秀滿女士;「公共推廣類」ke莊陳月琇老師lâu黃厚源先生;「青年貢獻類」ke林鈺婷小姐;lâu「特別貢獻獎」ke廖運範院士。

  終身貢獻獎ke得主徐正光教授,he籌備客家委員會ke重要推手,me he臺灣客家研究學會創始人,煞猛做客家研究lâu發表yi多篇重要客家學術著作,除忒參加社會運動、抽間推動「還ngài阿姆話運動」以外,ya識擔任臺北市客家文化基金會董事長lâu客家雜誌社社長,在建構國內外客家知識體系、行政體制lâu建立永續客家文化發展架構,十分偉大,學術lâu社會各界tu推崇kì。

  共樣得著終身貢獻獎ke楊貴運博士he世界臺灣客家聯合會創會會長,除忒團結海內外客家鄉親以外,在擔任國策顧問期間煞猛爭取不分區立委ke客家名額lâu客話訂為「臺灣四大官方語言」之一,對於推動以臺灣為中心ke世界客家組織不遺餘力,效益宏大,為海內外客家所景仰。

  傑出成就獎ke「研究發展類」得主蕭新煌博士,擔任客家委員會學術發展委員會召集人lâu國立中央、聯合2間大學的客家研究學院講座教授,致力提升整體臺灣客家研究ke質lâu量,ya推動成立「全球客家研究聯盟」,帶動臺灣客家研究lâu國際接軌;「藝術文化類」得主張芳慈女士,致力創作、出版客家文學,識得著臺灣詩人獎lâu吳濁流新詩獎,lâu國內多位女性作家成立「臺灣客家女性創作聯誼會」,煞猛參加、推動各類客家藝文展演活動,提升客家文學文壇地位;同類得主黃秀滿女士he客家戲國寶級人物,成立「黃秀滿歌劇團」用心經營,獲獎連連,同時ti各藝文中心lâu各級學校教授客家戲身段、唱腔,用心傳承客家戲曲。

  傑出成就獎ke「公共推廣類」得主莊陳月琇老師,he臺灣客家教師協會創會榮譽理事長,識在全國各地lâu美加地區舉辦客語教學教師研習,研發客語教學工具lâu教學方法,編輯客語教科書lâu附屬教具,he客語教學先驅;另一得主黃厚源先生高齡102歲,深耕楊梅地區,煞猛客家鄉土文史ke發展超過一甲子,採集楊梅在地文化、客家諺語、歌謠lâu故事liá-teû,lâu珍貴ke民間文學保存,yû長久深遠顯著貢獻;「青年貢獻類」得主林鈺婷小姐擔任客家電視臺lâu當多客語廣播電臺主持工作,使用道地客家用語、俚語進行歌曲創作,煞猛傳唱客家,以後生之姿奮力推動阿姆話,為客語揚聲,客語專輯識入圍第23屆流行金曲——最佳客語專輯獎。

  特別ke he,今年客家貢獻獎獎項新增「特別貢獻獎」,oi表彰傑出客家人士因為kì在專業領域ke優秀成就帶動客家族群整體聲望ke提升lâu各界對客家文化、語言ke關注。首位得主廖運範先生,he中央研究院院士,ti醫學領域當yû成就lâu貢獻,識得著歐洲肝臟研究學會國際肯定獎、教育部醫科學術獎liá-teû重要獎項,ya he《當代醫學》月刊發行人,做得講he客家之光,經決審委員會推薦為特別貢獻獎得獎者。

  客家委員會為表彰及鼓勵社會人士積極參與客家事務,自民國96年特別設立「客家貢獻獎」,he盡yû國家代表性ya he全球客家ke最高榮譽獎項,今年既經to第9屆,yû 78位海內外客家優秀人才得著liá殊榮,he當今全球客家界盡受大家注意ke榮譽獎項。

  2021「客家貢獻獎」參選者共計收件133件,其中女性參選人數高達48%,mò論he參選件數ya-he女性參選數量tu創下歷屆之冠。為鼓勵後生人參加客家事務,表彰客家領域yû卓越貢獻ke客家後生人,今年特別增設「青年貢獻類」獎項,參選ke後生人來自各專業領域,比將講:客家藝術文化創作、媒體、產業、研究教學liá-teû,客家委員會期盼未來透過本獎ke鼓勵,pûn還kha多ke客家後生做得參加客家事務,為客家文化傳承共下努力。