《客家消息》

 | | | 轉寄

轉載：苗栗大湖後生添手團成果發表

作者 2020.12.13

　　客家委員會副主任委員鍾孔炤十二月十號代表主任委員楊長鎮去苗栗縣大湖鄉參加「果香品吟浪漫大湖趣——後生添手團第2期計畫」成果記者會，鍾孔炤表示，客委會voi繼續支持青年返鄉創業，進行產業輔導、職人培訓lâu鼓勵地方創生liá-teû計畫。

　　鍾孔炤講，客委會一路里來推動後生人轉來故鄉做事、發展，後生人做得結合自家ke創意lâu想法，lâu在地ke農產品賣出去。今年因為疫情，民眾mo辦法出國，希望多到苗栗來háng-liau，liá-ha he來大湖採草莓ke好時節，歡迎大家來大湖。

　　後生添手團計畫以苗栗大湖鄉十二隻庄頭cho發展重點，透過在地後生人ke駐村lâu定期舉辦活動，鼓勵後生人轉來、根留苗栗，第1期計畫先前由社區環境基礎調查lâu擾動著手，既經完成相關基本資料調查、建置好初級ke產業、文化、地景liá-teû資料庫。

　　同時，透過前一期計畫輔導區域後生人團體「返青富民」，開創地方創生品牌「好好食飯」，以戶外餐桌模式，融合地方產業lâu客家文化精神，打造新客庄生活lâu文化體驗，pûn大家看著轉屋後生人帶動地方發展ke力量。

　　第2期計畫繼續以社區凝聚lâu擾動為基礎，進行社區長期發展願景ke再凝聚，持續針對後生人轉來、慢食慢遊慢活lâu社區培力liá-teû議題進行規劃lâu實踐。

　　整體計畫未來voi永續經營浪漫臺三線大湖地區駐地工作站，導入在地後生人駐村lâu定期舉辦論壇、發掘社區小故事liá-teû活動，繼續辦理民主參與式共識會議、建置客庄特色lâu地景資源資料庫lâu辦理「果香品吟浪漫大湖趣輕旅行」活動，加深對地方ke認同。

　　下晝鍾副主委去苗栗卓蘭訪視客家詹冰故事文學館lâu饒平客語園區，計畫lâu卓蘭國小日式舊宿舍修復、美化周邊環境，建置cho客家故事文學館lâu饒平客語小學堂，除忒收集並展出文學家詹冰ke文稿外，作為推廣卓蘭ke饒平客家語言lâu青年文學創作基地。