《客家消息》

 | | | 轉寄

轉載：五穀豐登慶秋收—— 2020秋收祭系列活動

作者 2020.10.25

　　六堆秋收祭登場lio！客家文化發展中心lâu六堆十二鄉區，tui 105年起勢，逐年秋季tu會在六堆客家文化園區lâu六堆各鄉區辦理「秋收祭」慶典活動，今年he第五年，還得著交通部觀光局肯定，入選為全國重點活動，特別ti全國觀光年曆中推廣歡迎大家來南部客家庄共下感受豐收氛圍。

　　今年五穀豐登慶秋收活動，規劃一系列「謝天還福祭儀」、「共下來藏福——千人積福菜開幕式」、「六堆客庄文化秋收體驗遊程」、「食福饗宴」、「慶豐收彩妝遊園活動」、「樂豐收展演」、「客家美食小棧——甩肉丸販售」、「傳統客家廚房展示」、「農村裝置藝術拍照lâu體驗區」及「六堆集福趣集點抽大獎」liá-teû跨兩禮拜拜六、拜日寮日ke豐富活動。

　　客發中心何金樑主任表示，逐年秋收祭，六堆客家文化園區tu會放兜細巧思lâu創意在活動底肚，今年主題he「曬豐收、慶豐收、享豐收、樂豐收」，比將講：「千人積福菜」he lâu豐收ke農作物「曬躁」後貯起來；「彩妝遊園活動」he由六堆十二鄉區民眾共下「慶祝」展現豐收ke成果；「食福饗宴」he邀請大家來六堆細細品嚐「享受」在地客家美味；「客庄秋收體驗遊程」帶大家探訪六堆客庄，實際體驗秋天採收lâu手作ke「樂趣」，系列活動十分受歡迎，開放報名後，當快完售，承蒙大家對客家文化活動ke支持lâu熱情！

　　十月三十一號to十一月八號期間，園區還特別設置了當多農村裝置lâu彩色蔬菜田liá-teû hip相區，做得hip出靚靚ke網美/網帥相片喔！還有當多m̀-sṳ́錢ke體驗設置，比將講：曬菜、曬穀lâu khâi擔。絕對做m̀得錯過ke he連續兩禮拜ke拜六、拜日，六堆客家文化園區還安排「客家甩肉丸」ke限量購，liá-he一道六堆客家庄，節慶時正吃得著ke隱藏版客家美食。

　　Liá-pái活動代言人he金曲獎最佳客語歌手羅文裕，kì講kì平常me當好做兜客家傳統美食，在kiâ面書粉絲專頁還yû一個「Hakka Eats!!」lâu大家分享kì在生活中、家人朋友親手製作ke客家料理，liá-pái當歡喜做得擔任六堆客家文化園區「秋收祭系列活動」ke代言人。

　　主辦單位表示，今年六堆客家文化園區特別規劃六條「秋收文化體驗遊程」活動，透過遊程探訪六堆客庄風土民情，lâu實地摘果、製作農特產品liá-teû特殊體驗，pûn大家做得還啊深入感受六堆客庄生活樣貌。同時精心設計限量版「六堆地圖拼圖」oi送pûn來參加遊程ke民眾，m̀單淨做得保存lâu回憶，還做得帶大家認識六堆喔！

　　五穀豐登慶秋收—— 2020秋收祭系列活動，日日tu精彩，活動期間還推出「六堆集福趣集點抽大獎」活動，民眾ti活動期間，參加秋收祭各項活動，就做得得著一ke章，集滿五隻，就做得參加「集福遊戲」，兌換摸彩券一張，在十一月八號閉幕活動中抽出所有獎項，獎項yû筆電、GPS 智慧腕錶、iPad、折疊腳踏車、LED保溫瓶liá-teû大獎。

　　活動期間在六堆客家文化園區還yû當多活動，像「十月二十四號(拜六)to十一月八號(拜日)2020移墾耕讀遊樂趣」、「十月二十八號(拜三)客家祭儀ke社會變遷lâu性別平權座談分享會議」、「十一月七號(拜六)尞客庄　趣野餐」、「十一月八號(拜日)農事學堂——採菜趣」，還啊多詳細活動內容lâu報名，歡迎to六堆客家文化園區網站：www.thcdc.gov.tw及活動粉絲專頁https://www.facebook.com/I.LOVE.LIUDUI.HAKKA/查詢。歡迎全國鄉親朋友共下to屏東六堆體驗客家秋收ke樂趣。