《客家消息》

| | | 轉寄

轉載:「行動灶下」巡迴海外 「客家美食」驚艷亞洲

  「海外客家行動灶下」亞洲團ti今年九月十月to九月二十四號巡迴日本、馬來西亞lâu泰國,辦理客家美食推廣、傳承客家好味緒。

  Liá-pái亞洲團he由客家委員會lâu僑務委員會、外交部駐外館(處)lâu東京崇正公會、日本關西崇正會、馬來西亞檳州客家公會、泰國臺灣客家同鄉會共下合作,由電視名廚張亞莉lâu大學餐飲教授李杰奎兩位主廚擔任示範講座,東京崇正公會lâu日本關西崇正會共下then-sú,ti九月十號to十四號to東京lâu大阪教人煮客家菜,推廣客家美食。

  九月十六號to十七號兩位主廚to馬來西亞檳城推廣客家美食,設計了沙巴鹹蛋金銀薯、椒鹽金沙拌苦瓜lâu客家福菜胡椒鴨……當多創意料理,當siàng人。Liá-pái me he頭一擺ti泰國曼谷lâu長榮桂冠酒店合作,進行客家美食技術轉移,ti九月十九號to九月二十號培訓客家Buffet廚師,九月二十一號to二十四號以半自助式ke方式,lâu部份菜色用桌菜呈現,ti現場進行客家料理live show,藉由輔導飯店技術轉移,pûn客家美食做得傳揚、深耕泰國。九月二十二號to二十四號ti長榮桂冠酒店舉行客家美食示範教作,邀請學員體驗製作牛汶水、擂茶lâu chhì-pâ,pûn旅居國外ke客家鄉親,食著熟識味緒,一解鄉愁。

  Liá-pái「海外客家行動灶下」亞洲團mò-lun ti日本東京lâu大阪推廣ke「什錦海鮮炸婆菜」、「客家酸菜水煮魚」、「紫蘇梅苦瓜雞」;馬來西亞檳城分享ke「客家福菜胡椒鴨」、「桔醬涼拌鮮蝦球」;泰國曼谷推廣ke「紅棗金柿燉雞腿」、「客家擂茶湯泡飯」、「客家鹹香芋頭粄」lâu「杏片腐乳拌過貓」,都he當yû創意lâu巧思ke客家創新料理,m̀-tân-chhiang pûn旅居國外ke客家鄉親做得食著故鄉菜,me oi pûn客家美食征服海外人士ke味蕾。