《李喬小說─孤燈》

 | | | 轉寄

四、雲lâu月(11)

作者 李喬 漢羅翻寫：李珊伶、劉敏貞 2012.08.05

　　——liá下，ke單淨有正規ke軍人chang做得享受到ke特別「慰安」，居然也oi分一杯羹pûn勞務團ke「苦力」嗎？

　　永輝來到liá片，無幾久就聽到傳說：liá細細ke彈丸之地，也有一所「臨時慰安所」。慰安所有二十零個細妹人；m̀係本島人，係東西二鄰，雷伊泰島lâu尼格羅島弄來ke.

　　「隨便lâu人家ke細妹人弄來？」他無辦法想像，一ke良家婦女pûn人強逼到án-ngiòng ke地方，做án-ngiòng ke事情，會係樣仔ke景象？

　　 Ko想m̀到ke 係，liá-ke雙倍工作量完成後，他所屬ke細隊，居然係產生pûn「獎勵」ke著象。Liá係驚天動地ke大事，歸個事務團都騷動起來，好像忽然之間，大家又恢復到覺醒ke人ke身分啦。

　　「彭永輝，pûn你一張票！」細隊長看中他。

　　「我？我……」

　　「彭永輝，你鳥福氣m̀會差嘛。」

　　「好呀！彭永輝，你liá死也瞑目啦。」

　　「彭永輝，樣仔？」細隊長有teû m̀耐煩。

　　「……我，我 無oi。」永輝轉身就行。

　　「無oi? 哈哈！」

　　永輝liá一舉動，全班ke人都楞lè. M̀過，接tén真sṳt oi將票pûn má人時，má人都有teû逡巡不前。最尾由一ke綽號「阿沙逋路」ke 拿去lè.

　　事情決定以後，永輝就成為大家取笑ke對象：

　　「你彭永輝，m̀敢呀？」

　　「M̀係m̀敢，係……」

　　「M̀會？哈哈！」

　　「我知你係，」周勝祥正色講：｢內心想tén pû娘，對m̀對？｣

　　「唉！就算係吧。」

　　「我……也m̀會去。」周想想講：「Liá一鬧，想係想oi, m̀過我也m̀……」

　　係ke。他也係想oi. 他結婚無幾久，係一個壯實ke 31歲男人；雖然近來半年來，ke種需要，全死lè, 頭下經大家一講，心火煞又pûn了起來。Liá係不滅不死ke火喏！又倦又想睡oi崩塌ke時節，在 ke昏昏暈暈ke奧底，煞埋tén一團堵到風就燒起來ke火種；它根深蒂固就像生命ke盤結，或者講係它在鼓動生命ke脈動；它就án-ngiòng自強不息。

　　「M̀過，我還係無oi……」永輝ke心坎底背，火苗柔柔ke燒tén.火苗內閃現一ke白中透紅ke胴體，阿貞ke胴體，pûn他ke滾滾山洪不致於氾濫成災ke胴體；pûn他在最m̀自覺自家係生命ke主人ke時節，做得維持一絲靈明ke細妹人。

　　他無接過ke張「招待單」。他感覺，阿貞lâu他係án接近；從阿貞ke笑容看得出，阿貞完全信賴他。