《李喬小說─孤燈》

 | | | 轉寄

二、送行 (5)

作者 李喬 漢羅翻寫：李珊伶、劉敏貞 2012.02.12

「好啦！」明青向大家使個眼色：「我喚明基lâu福興講，oi他遽遽轉來。」 　　

Tshin明顯，福興嫂-靜妹ke心神有têu混亂。係思念老公變成án-ngiòng ke?還係肚饑ke煎熬pûn她án-ngiòng? 　　

「福興嫂！」明基輕聲細語ke安慰她：「請放心，我會想辦法去尋福興哥，oi他遽遽轉來-m̀過，妳自家oi保重，好無?」 　　

「好啦！好啦！嘻嘻！」笑聲，好像明森哩。 　　

「細人仔，oi看好，知無?」明青講。 　　

「Oi餵飽細人仔喲。」 　　

「係無好食嘛！會餓死了！」 　　

「蕃薯呀！弄têu蕃薯充饑。」 　　

「無啦！我m̀會種……嗚……」哭了起來。 　　

明基lâu大、二哥參詳後，lâu做當晝飯ke蕃薯乾全拿出來，交pûn福興嫂。 　　

福興嫂又哭又笑地，轉身轉橫坑去了。 　　

「福興嫂！」明青喊：「妳têu兩子ôi係無東西食，就到蕃仔林來！大家then手，m̀會pû你têu餓死ke!」 　　

「好啦！好啦！我家福興oi轉來leh！」 　　

阿貞看到liá-têu，又掩著面，躲到後背去了。 　　

明基心頭，塞上一團濃濃ke茫然。 　　

Liá下，唯一安慰ke係，自家還màng結婚；老阿姆有大哥他têu奉養；大哥四十八歲了，應該m̀使長久外出奉公吧。 　　

「阿華，會到庄役場前送我嗎？」他想。 　　

老實講，她在昨暗晡應該來蕃仔林正對；還oi顧忌mak-ke nò? Liá次ke分離，十、九就係……做mak-ke她m̀會把握liá難得ke相聚？ 　　

無定著，在她少女ke矜持，或者怪自家m̀利用時間去看她，lâu她多聚一聚喏。 　　

係án-ngiòng嗎？假使係án-ngiòng,ke真係pûn人當懊惱。M̀係嗎？此時此地，她還oi mak-ke少女ke矜持-擺架子？ 　　

故所，昨晡日lâu永輝去跋鷂婆嘴，也係一種發洩，一種報復ke自虐！阿華，樣仔做得án-ngiòng冷漠喏？阿華，妳真係無情ke細妹仔嗎？或者另有…… 　　

「M̀係!無應該lâu她想成án-ngiòng.」內心又浮出反駁ke聲音：「做m̀得án-ngiòng想她，liá thet侮辱她了。」

阿無，她到底係樣仔ke細妹仔喏？ 　　

她最少，應該知liá打早，趕來迎他，接他，然後在街hong, 公然地送他出征正對！他想。她，阿華，正經就在面前-大湖街入口，「社寮角」ke茶亭hong等他喏。