《蘭軒小築》

| | | 轉寄

水鬼仔

「阿學!阿學……」
「啊!He阿文ke聲音……」佢在屋家外背大聲喊。
「細聲啊!Oi同我屋家人吵醒咩」我話佢講。
阿文he我ke細人伴,有時節,佢常透湊我出去遊料……除了我等兩儕 以外,還有阿貴同阿山也來哩。
「今晡日oi去奈?」我問。
「我等來去河壩搞水好mò?」阿文講。
「但he,我阿姆喊我mò搞水呢!我m̀想pûn人罵……」
「你實在還mò膽,幾多歲還聽若姆个話……」阿貴恁呢謔我。

官倉入去兜仔有一條河壩,he東港溪ke下游,熱天,當多細人在該邊 搞水。偎村莊這片,有一片竹仔林,起風ke時節,葉仔搖啊震動發出 窸窸窣窣ke聲音,蓋像有鬼怪在底肚,大家坐啊底下歇睏,阿山又好 講鬼故事嚇人,有成時,還正經會pûn佢嚇著。
「我驚蛇哥呢!」
「我驚佢piang適竹仔林頂項……」我講。
「噢!恁驚死!」阿貴又過謔我哩。
「啊!你等看!頂項蓋像有蛇哥在趖……」阿文打忸惇講。
「哇啊!有蛇哥!」話還吂講忒,大家就瀉淨淨,一隻影都無……
「還講我驚死,結果你等續走啊比我還遽。」
「等我啊!莫走恁遽啦!」我適後背大聲喊……

聽阿婆講,水底仔有水鬼仔會neú人,尤其he七月半該時——
噗通!阿貴跳入去河壩搞水,搞个蓋暢。
「你等也來啊!水還涼沁沁仔呢!」
我mò下去搞水,因為我緊愐阿婆同我講過个事。
「阿學!下來啊,來搞水啦!」
「我m̀會泅水啦!我適這位等就好哩啦!」
大家這下搞ke好激激仔時節,阿文續喊救命!
「啊!救我!救我啊!」
堵好附近有趕羊仔食草ke利富伯適該,佢煞煞下去救阿文。
旋旋風,我蓋像有看到一個青青ke影仔在páng阿文ke腳, tàng-tàng m̀肯放樣仔,後尾利富伯使力,正救哩阿文上來。

「細人仔mò走來這搞水,好得我適這,萬一發生事情愛仰葛煞!底下 ke泥石pûn砂石車挖走哩深到無底,你等還恁敢來這……」利富伯大 聲罵講。

歸去屋家,我分阿姆用竹修仔修哩幾多下……。
原來,利富伯來同阿姆講頭到ke事情……
「下晝頭m̀睡目,偷走出去料……結果……」阿姆緊修緊罵……
「我下二擺m̀敢哩啦!Mò打我啦!」我噭豺豺講……

該阿文呢?聽人驚你歸去過後發燒幾下日都mò醒,後來厥爸帶佢去仙 姑廟收驚看看啊,食了符水,人續漸漸醒了。
恁多日,佢mò來尋我料,我想,該日个意外,應該單淨佢一等清楚 吧!我愐……。