《江嵐客家文學專欄》

 | | | 轉寄

Fûng-sṳ̀-yí..風時雨

作者 Kông-làm...江嵐 2008.04.13

listen


Hâ-tsu si-tiám
下晝四點
Thiên-táng vû-thiên-am-thi thai-thìn-thien
天頂烏天暗地大停電
Luì-kûng lùng-lùng kung-kung fat-sin-thí
雷公礱礱公公發性體
Ngiap-lang phi-li-pha-la tseu-kông-sien
聶爧霹靂啪啦照光線
Yit-tshṳn thai-yí tui û-sân-thèu ke-phién
一陣大雨對烏山頭該片
Pêu yit-lu ko-lòi
驫一路過來
Tshiong tséu-siông-kiuk yong-é
像走相趜樣仔
Pi-li-po-lo
霹靂啵囉

Pha̍k-ho̍k-é khong-to su-khûng-tú
白鶴仔囥到樹孔肚
Vò-pit-é khong-to kón-phàng-hâ
禾畢仔囥到稈棚下
Vuk-yàm-tiâu pî-to ngà-vuk-kâ
屋簷鳥飛到吾屋家
Lièn-fâ fu-m̀-tshat von-tsâ
蓮花赴m̀掣換遮
Pún-pún yung kì tái-ngit-thèu ke- kî fâ tso-yí-tsâ
本本用佢抵日頭該支花做雨遮
Fùng-tshiâng-vòng-kîm-tsṳ́ ke lièn-fâ
紅青黃金紫ke蓮花
Khî-tshai suí-tûng-ông mò nái khong
企在水中央mò奈囥
Kuái-è thiau-lo̍k lièn-ya̍p-hâ
拐仔跳落蓮葉下
Luk-to lièn-fâ seu-hâ-hâ
摝到蓮花笑哈哈

Seu-sâng màng su̍t
笑聲吂悚
Fûng-sṳ̀-yí tséu-to mò-kien-yáng
風時雨走到mò見影
Kuái-è thiàu-sông lièn-ya̍p-táng
拐仔跳上蓮葉頂
Lièn-fâ yit-luî yitlui5 sû-tsâ
蓮花一蕊一蕊收遮
Fùng-tshiâng-vòng-kîm-tsṳ́ ke kôn-yîm
紅青黃金紫ke觀音
Khî-tshai suí-tûng-ông tseu-yáng
企在水中央照影
Vuk-yàm-tiâu pî-tshut vuk-yàm-hâ
屋簷鳥飛出屋簷下
Vò-pit-é pî-ko tshiâng-tsuk-yèn
禾畢仔飛過青竹園
Yit-tshṳn pha̍k-ho̍k-é pî-sông-thiên
一陣白鶴仔飛上天

Fûng-sṳ̀-yí hàng-ko ke thiên-sṳ̀
風時雨行過ke天時
Ngit-thèu yu-lòi siông-tsia-mun
日頭又來相借問
Û-sân nám-yùn sióng-hâ-pân
烏山攬雲想下班
Tiâu-é ke kô-sâng thi̍t-phe̍t thiàm
鳥仔ke歌聲特別甜