《江嵐客家文學專欄》

 | | | 轉寄

圓一隻尋根ke阿姆節(2)

作者 Kông-làm...江嵐 2009.08.02

　　八十歲ke舅婆，還做得帶等包袱仔，跈隔壁鄰舍共下出去遊覽，he ngài-teû盡歡喜ke事情，幾年前舅婆著到蜂窩性組織炎，邸院當久，大家就當愁，表舅同表舅姆大家mò日mò夜顧矣盡久，好在好人有好福氣，總算醫好矣；今晡日做得看著舅婆復原到恁好勢，身體還當紥增，pûn ngài試到盡安慰。表舅表舅姆逐儕就當親切，姐婆伙房旦旦he做生理人，故所大家就當無閒，連後生ke表姐同表嫂都做到捩捩轉，生活過來異充實。

　　該暗晡，表舅表舅姆lâu雜貨店關起來，度ngài-teû去圳溝唇ke細姨婆屋家坐，雖然細姨婆mò在矣，厥賴仔心臼聽著ngài-teû來嫽，還he當親切請ngài-teû食冰，因爭這隻單丁子ke表舅，後生時節在工廠做事pûn火熝到，歸隻手瘸忒，mò法度食頭路，就在這間圳溝唇ke細屋仔做生理，賣茶米合賣冰。表舅姆me mò簡單，嫁過來以後逐年就同人度細人仔維持生活，到今，繳三個賴仔，一個妹仔讀高中lâu大學。看著手mò方便ke表阿舅泡茶請ngài-teû，ngài就試著當敗勢，盡想做得為佢兜幐手做麼該mò。

　　Ngài還細ke時節，識跈阿姆來過這，食過表舅姆ke冰，記得該央時ke冰當實在、有料，盡好食，表舅姆就像有聽著ngài心肝肚ke話樣仔，堵堵好兜一碗紅豆牛奶、黃梨冰pûn ngài食，ngài暢到奈m̀得，趕緊先食一口，還細ke記憶就像走相趜仔樣仔，一路尋轉ngài頭擺ke味緒，紅豆牛奶、黃梨冰，在嘴肚項跳舞ke感覺，又喊倒轉ngài童年ke記憶，一息就mò變，還感動哦。十過年來，表舅姆共樣細細隻仔，mò較大mò較高，笑頭笑面，pûn人試到當親切，一息就m̀會生份。

　　行過姨婆lâu舅婆ke屋家，看著一個大家庭ke和挼同互相照顧ke貼心，me有看著大家在生老病死之下，互相支持相惜ke情誼，還看著身體殘障ke親戚，做得自立自生ke堅強人生哲學，越煞猛ke人得到越豐富ke生命經驗。雖然he一個細細ke庄頭，ngài-teû看著一個家族ke原始生命，在這位緊延續落去ke精神，這he ngài-teû這轉對姐婆ke故鄉盡大ke收穫。

　　食飽晝，帶舅婆轉到阿姆ke故鄉──油桐花燦爛ke三叉，看著阿姆行過ke腳跡，一生人盡浪漫ke阿姆，總係盡合意相絲花同油桐花共下盛開ke季節，逐年四、五月就he佢思鄉ke日仔，m̀管he邸在奈位，到矣這隻季節佢就會心焦，心焦ke來源he相絲花ke味緒在該喊佢。行一轉滿奈油桐花開ke山林，佢就會再講一擺頭擺阿公阿婆，仰般做山摘油桐子pûn日本人做屐仔、捽來火，還pûn日本人做飛行機ke油，這兜陳年往事。佢又講相絲樹ke樹筒盡硬，he燒火炭盡讚ke材料，在苗栗山肚出世ke阿姆，有戀山ke症頭，無論走到奈位，看m̀著山就會心焦。