《江嵐客家文學專欄》

| | | 轉寄

客家發風吹──硬頸江秀鳳(Holo)

熟sāi江秀鳳15年,稱呼「江嵐」無啥慣勢,我攏tuà台北,i早期bat tī詩人律師莊柏林ê事務所上班,在來tuà台中,前幾冬cha-poó子就學徙去台南,tī母語文學都合chiah會相tn̄g頭。

  1992年起tī各縣市成立台文通訊讀者聯誼會招人研讀台語文,台中市ē負責人是正義兄,主要ē工作聯絡者是秀鳳,ta̍k禮拜會見一pái面,秀鳳學會曉白話字,有leh創作Holo台文,我bat鼓舞i用客話書寫。

  台灣文學史nih有幾個出名ê小說家是客籍—ē,kiám-chhái是客人ē文學恩賜khah足,m̄-koh chiah chē文學大老,罕得讀著in ē客文書寫作品。我ē朋友黃恆秋有出版客語詩,ká-ná無寫小說、散文。今年客委會頒發客家貢獻奬,對象lóng是出名ē客籍人士,m̄-koh有幾位得奬人成名ē領域kap客家文化無關係。社會有kuá客籍ē文學者,lán讀--著--ē全是中文書寫,mā有人ka-tī無beh寫客文學,koh leh反對Holo人用母語寫作,聽講其中mā有人態度改變--a。

  我有熟sāi幾個寫客語詩ē女詩人,khah chē歲ē杜潘芳格真疼--我,見面攏jîm褲頭ē暗袋仔,iap銀票hoō我做所費用,i誠心歡喜我phah拚推sak母語文運動。劉慧真讀師大研究所就leh寫客語詩,阮早期出版ē台語有聲叢刊雜誌有收幾首真súi ē作品,最近ká-ná無koh讀著i ē詩。利玉芳、張芳慈tī笠詩社熟sāi了就有交陪,in ē客語詩mā寫kah詩情意境súi氣。

  秀鳳kap這幾位比起來,算khah晏出道,m̄-koh詩情仝款,2008年詩行大會i ē詩mā hoō chē-chē m̄-bat客語ē聽眾、讀者感動,這時koh發展散文、小說,2007「汝係捱一生人个新娘」、2008「山肚來个細阿哥仔」攏tī阿却台文賞入選得奬,講--起來好笑,小說類ê無幾篇,可見推動客家小說、散文創作是真緊急ē khang-khuè。

  秀鳳這本客語散文集,ta̍k篇水準齊勻,對客家慣勢、風俗、文化、思維、價值觀有深入ē探討,khak寶貴—ē,koh有訪問、田野調查,親像五日節,che真好,講實在—ē,「立雞蛋.香包」Holo 人mā無,這是kā「七娘媽生」炒作做「中國情人節」ē商業文化,對台灣文化內涵來講,bē tàng啓示什麼。有這篇各地客人庄ē調查,幫贊lán清楚一kuá思維。

  我有鼓舞秀鳳phah拚小說創作,i講驚客話語彙無够bat,我khah早寫Holo小說mā tn̄g著仝款問題,ná寫ná研究若chhuē,了後我ē作品所引用ē語詞就會hoō人採用,按呢對母語文書寫運動chiah有具體ē幫贊。

秀鳳身體狀況無好,m̄-koh i堅持tiām-tiām耕作「母語个菜園」,客人就是硬頸ē精神氣概,這本冊出版,應該tī客家ká起一陣風,清風、春風細細港,若khah chē人讀,khah chē人寫,mā會hoō客家文化做風颱(發風吹)。Lán弱勢台灣文化無軟chiáⁿ ē權利,硬頸啊,阿秀鳳!

2008年8月13日

(王薈雯同學打字)