《江嵐客家文學專欄》

| | | 轉寄

山肚來ke細阿哥è 第七集

來來去去mò閒當中,眼看就愛過年nè。有一暗晡,老虎哥同阿成喊到牛眼樹下,lâu kì講:「下屋ke阿火伯,其lai-è在台北買屋,kì歸家人打算愛搬去台北,想愛lâu lià隻屋賣忒,m̀過,lià山肚項ke屋盡少人買賣,kiâ屋又án細間,ngì he有想愛ke話,ngài lâu ngì做中人,去同kì講價,ngì想ngióng般?」阿成hién hién風聽到lià隻消息,續ngiòi一下,應m̀出話來。kì自從就m̀識想過愛買屋ke事情,再過講自家lià半年賺ke錢me mò la買屋,老虎哥當熱心,還講錢he mò la會先代kì出,總he愛價數公當正來講,老虎哥講:「ngài斯lâu ngì當做自家ke兄弟è唷,ngiâ屋家het到án偏僻ke深山肚,就算下二擺有好對象,麼sà肯嫁入深山壁角去nó,阿火伯ke屋án舊故所價數好講,mò ngì考慮看哪,想好正同ngài講,買到來過忒年就做得lâu ngiâ姆接來lià het,án樣近近è大家me做得互相照顧,ngì就做得日日轉屋,有阿姆在身邊,做起事來me加較安心。」

lià暗晡,阿成像煎魚樣è fân過來pién過去,就he睡m̀落覺,緊想買屋án大ke事情,kì一生人就m̀識想過,過較m̀知講買一間屋算來愛幾多錢?想到深山壁壢角mò人煙ke所在,一到斷烏就暗摸sî sô,成半隻月就看m̀到一ke人影,總愛等到mò鹽ke時節正會行歸半晝邊ke路去阿油叔婆屋家,拜託kì-teû he有去街項正順續買轉來,mò就愛等到阿油叔婆屋家人做事在lià過,除忒阿油叔婆以外,附近幾下粒山頭就mò het人家。he做得買一間屋,lâu阿姆接出來het,阿姆就做得m̀使在山肚食苦,m̀過,算來買屋需要幾多錢?lià正he盡愁ke所在。

天光ke時節,老虎哥又走來同阿成講:「昨暗晡有下去阿火伯ke坐,kì講屋è斯舊舊漏漏lè,愛ngióng般算錢,屋肚ke眠床桌凳,kiâ lai-è一件就m̀肯分kì搬去,he阿成愛ke話a,就半相送è哪,算買地ke錢就好哪!」lià兩日阿火伯ke lai-è阿銘就愛轉來帶kì倆老上台北lè,老虎哥三講四講,阿成心肝就停動lè,決定愛去看屋è,再過當面同阿火伯講一下較實疊,老虎哥有講過錢he mò-la kì會負責,m̀使算利子,好好thèn kì做事,慢慢還就做得。