《江嵐客家文學專欄》

 | | | 轉寄

Sîm-lìn lî-hàng...心靈旅行

作者 Kông-làm...江嵐 2008.05.25

listen

Tshin tsap-puk ke sîm-lìn lî-hàng
盡紮腹ke心靈旅行
Kú-tû lo̍k-yí suí-suí-tsiâng-tsiâng
古都落雨　水水靚靚
Tshak-khám-lèu khûng-tsṳ́-meu
赤崁樓　孔子廟
Tsû-fùng-set ke piak
朱紅色ke壁
Yit-khiap ke kú-tsiak
一級ke古蹟
Meu-tshièn ke vuk-yàm-suí
廟前ke屋簷水
Tiet-lo̍k tshiên-ngièn ke sîm-sṳ
跌落千年ke心事
Pâ-khiet-lî-ki-ngiam-kûng-yèn
巴克禮紀念公園
Tsho-sîn ngi-làng-làng-tshit-ngièn tshiòn-khiù khiet-tshut kien-tsuk kîm-tsióng
創新2007年全球傑出建築金奬
vân-vân ke muk-tsho-khièu sṳ̂-tshìn-fa-yi
彎彎ke木造橋詩情畫意
Â-phò-lo he yit-tshon yit-tshon kîm-vòng-set ke yòng-mî-é
阿勃勒he一串一串金黃色ke揚尾仔
Fung-fòng-fâ he yit-tsak yit-tsak thai-fùng-set ke yòng-ya̍p-é
鳳凰花he一隻一隻大紅色ke揚擛仔
Lièn-fâ he yit-tsán yit-tsán ńg-fâ-sṳp-set ke kông-mìn-tên
蓮花he一盞一盞五花十色ke光明燈
Tsiu-fùng-nêm-vòng ke lo̍k-fâ suí-yáng
啾紅淰黃ke落花水影
Tshiong sóng-fâ-ngìn ngién-tsûng ke tshû-siong-fa
像賞花人眼中ke抽象畫
kuî-phài tshap-tshè ke yòng-liú he thai-thi ke lò-khiùn
歸排插齊ke楊柳he大地ke羅裙
Se-se thiàu ke tsun-kiêu liù to mung-fù
細細條ke圳溝流到夢湖
Kiang-thèu ngoi ke fûng-kín
鏡頭外ke風景
Khiùn sàn tsên-mìn ke sâng-seu
群蟬爭鳴ke聲哨
Han-thong fung-fòng-sàng ke tshû-ha
撼動鳳凰城ke初夏