《客語漢羅聖經試讀版》

 | | | 轉寄

馬太福音第二十章_01 葡萄園ke工人

作者 客語聖經 2012.05.06

20:1 「因為天國可比這個故事：有一個葡萄園ke主人打早出去，請工人去他ke葡萄園做事。
20:2 他同他têu約定一日ke工錢係一隻銀錢，就喊他têu入他ke葡萄園做事。
20:3 朝晨頭九點鐘左右，他又去市場，看到有人閒閒khî在該位。
20:4 lâu他têu講：『你têu也去葡萄園做事，我用公當ke工錢來pûn你têu.』Ke-têu人就去。
20:5 大約當晝十二點lâu下晝頭三點鐘，他又出去，也係án-ngiòng請têu工人來。
20:6 到下晝頭會五點鐘，他又出去，又看到有人閒閒在kikhi5，就lâu他têu講：『你têu做mak-ke歸日閒閒在這khî喏？』
20:7 他têu對他講：『因為無人聘請我têu.』他就lâu他têu講：『你têu也來葡萄園做事。』
20:8 等到臨暗仔，葡萄園ke主人對工頭講：『喊ke-têu工人來，發工錢pûn他têu，從最尾入來ke先pûn, 直到最先入來ke.』
20:9 Ke-têu五點鐘正前來做事ke,每一ke人領到一隻銀錢。
20:10 Ke-têu最先入來做事ke人，他têu想他têu一定領較多；總係他têu也係領一隻銀錢。
20:11 後來，他têu就對ke主人有埋怨，
20:12 講：『我têu歸日在列日下勞苦，他têu最尾來ke單單正做一點鐘久ke事，你也pûn他têu lâu我têu平多ke工錢。』
20:13 Ke主人對他têu其中一個人應講：『朋友啊，我無虧欠你têu. 你têu前m̀係lâu我約定好，一人ke工錢係一隻銀錢嗎？
20:14 拿你ke工錢轉去；我oi pûn最尾來ke人，同pûn你ke工錢一樣。
20:15 敢講我無權好用我自家ke錢嗎？因為我ke慷慨，你têu就眼赤赤嗎？』」
20:16 總係最尾ke將oi做頭前，頭前ke會做最尾。