《客語漢羅聖經試讀版》

| | | 轉寄

約翰福音 第四章_1 耶穌lâu撒馬利亞ke婦人家

4:1 主既然知法利賽人有聽到祂接人做門徒,有lâu他teû行洗禮,比約翰較多;
4:2 (其實耶穌自家m̀識親身行洗禮,係Kiâ門徒),
4:3 所以祂就離開猶太,倒轉去加利利。
4:4 祂一定oi由撒馬利亞經過。
4:5 總係就來到撒馬利亞ke敘加鎮,離雅各pûn他ke lai-é約瑟ke土地無幾遠。
4:6 在該位有雅各井。耶穌行路盡khioi,就坐在ke井sùn. Ke時大約當晝。
4:7 有ke撒馬利亞ke婦人家來打水;耶穌lâu她講:「Pûn我飲。」
4:8 因為Kiâ門徒已經去街路買食物。
4:9 Ke撒馬利亞婦人家就對祂講:「既然係猶太人,做mak-ke lâu我撒馬利亞婦人家討水飲喏?」(因為猶太人lâu 撒馬利亞人無相來往 )。
4:10 耶穌應她講:「妳既然知上主ke恩典,也知lâu妳討水飲ke係má人;妳就必求祂,祂就必有生命ke水pûn妳。」
4:11 婦人家就lâu祂講:「主啊!祢無打水ke東西,井又án深;祢對nai位有這個生命ke水nè?
4:12 祢láu-tó祢大過我teû ke祖父雅各mé,他pûn我teû 這個井,他自家lâu他ke lai-é,lâu他ke頭牲,也係在這個井食水? 」
4:13 耶穌應她講:「凡人食這個水會再嘴燥;
4:14 所有食我所pûn他ke水,永久m̀會渴;我所pûn他ke水必定在他底背成做泉源,直直湧出直到永生。」
4:15 婦人家lâu祂講:「先生用這個水pûn我,使到我永遠m̀會渴,也m̀使來這位打水。」
4:16 耶穌lâu她講:「去喊ngiâ老公來這位。」
4:17 婦人家講:「我無老公。」耶穌 lâu她講:「妳講,妳無老公,無m̀-chho̍k.
4:18 因為妳既然識有五個老公;這下同妳共下 ke也m̀係妳ke老公;妳講這個話係真。」
4:19 婦人家lâu祂講:「主啊!我看出祢係先知。
4:20 我teû ke祖先係在這個山頂敬拜;總係你teû講,人應當敬拜上主ke所在係在耶路撒冷。」
4:21 耶穌lâu她講:「婦人家啊!Oi信我,時候會到lé, 你teû m̀會再去耶路撒冷敬拜阿爸,也m̀會再來這個山。
4:22 你teû m̀識你teû所敬拜ke;我teû識我teû所敬拜ke;因為拯救係出在猶太人。
4:23 總係時候會到,這下就係lé,真心敬拜ke人用身體lâu真實來敬拜阿爸;因為阿爸係尋這種人來敬拜祂。
4:24 上主係聖靈;人敬拜祂,一定oi用心靈lâu真實來敬拜。」
4:25 婦人家lâu祂講:「我知彌賽亞 (即係稱做基督) oi來;祂來這必定oi將一切ke事報我teû知。」
4:26 耶穌lâu她講:「Lâu妳講話ke就係祂。」
4:27 到這下祂ke門徒就來;感覺盡奇怪,看到祂lâu婦人家講話;總係無人問ke婦人家:「你尋mak-ke? 」抑係問耶穌:「Ngióng會lâu她講話喏? 」
4:28 婦人家就放她ke水甕在該位,去街路,lâu ke-teû人講:
4:29 來看一個人,我平時所做ke事祂全部有lâu我講:「這個敢係基督嗎? 」
4:30 他teû就離開街路來看耶穌。
4:31 這時門徒喊祂講:「先生請食。」
4:32 總係祂lâu他teû講:「我有東西好食,係你teû m̀知ke.」
4:33 門徒就商量講:「敢講有人送東西pûn祂食嗎? 」
4:34 耶穌lâu他teû講:「遵行『差我來ke人』ke旨意來做完祂ke工,即係我ke糧。
4:35 你teû講:『加四個月,正係收割ke時節?』看啊!---我lâu你teû講,舉起你teû ke目看田,田已經黃,好收割lé.
4:36 收割ke人得到工錢也為永遠ke生命積存五穀;使委種ke人lâu收割ke人好一同歡喜。
4:37 因為俗語講:『前人栽種,後人收成』在這個事就係真實。
4:38 我差你teû去收割m̀係你teû耕ke田地;別人有努力,你teû享受他teû ke努力。」
4:39 街路有盡多撒馬利亞人信靠祂,係因為ke婦人家所見證ke話,「講祂將我所行ke事全部講pûn我知。」
4:40 總係撒馬利亞人看到耶穌,就求祂lâu他teû共下住;就住在該位兩日。
4:41 已經盡多人因為耶穌ke話來信。
4:42 他teû就lâu ke婦人家講:「這下我teû信,m̀係因為妳講ke話;因為我teû 親身聽道理,就知這個實在係世界ke救主。」